想起小辰光个趣事

文/许德华

今年春节大家侪“宅”辣屋里向，我也一样。空闲辰光一多就难免想七想八，忽然想起小辰光过年个有趣事体。

记得埃歇辰光阿拉屋里住辣沙泾港旁边一个叫张家院子个地方。院子里一共有十几间房子，当中有一间又高又大，白墙黑边，邪气挺括！

住辣搿搭个人家交关多，侪是从天南地北来嗰，各有各个方言，平常吃饭辰光茄山河，让阿拉搿点小八腊子学会了勿少方言，比如称呼小朋友，老张家叫“小伢”，绍兴人叫“小乖骨”，结果“小乖骨”到了山东人嘴巴里就变成“小坏锅”……当然，阿拉平常讲得最多个还是上海话。

到了过年辰光，院子里就要大扫除，除脱揩窗扫地，还要用白石灰粉刷墙壁。埃歇辰光呒没洗衣机，但是床单被面还是要汏嗰，汏好以后，邻居相帮绞干，晒辣拉好个绳子和竹竿浪。当时年货按大户小户凭票供应，品种包括：香瓜子、糯米、鸡鸭鱼肉等等，宁波阿娘屋里是“小户”，凭票供应个糯米粉不够搓汤团，伊就改买糯米，买回来以后自家磨粉。

除脱以上搿点事体，还有三桩事体我印象特别深：

第一桩是守岁，就是大年三十夜里要到下半夜才困觉，据说搿能屋里辣新个一年里能够富足。对阿拉搿点平常夜里九十点钟就上床个小朋友来讲就比较难熬了，外婆就辣年夜饭吃好以后，叫大家一道包饺子。白相捏面粉是我搭妹妹最开心个辰光。包好饺子，多余个饺子皮用刀斩一斩，放到油锅里一炸，就是又脆又香个“巧果”。因为有面粉可以白相，又有“巧果”吸引，即使眼皮打相打，我搭妹妹还是硬撑到下半夜再困。

第二桩是爬门——大年夜困觉之前，阿拉搿点五六岁的小人要到大房子个大门前爬高。据同学唐帼英个奶奶讲，爬得高个小人长得高，身体好。唐奶奶是苏北人，伊每次侪立辣边浪向看牢阿拉搿点小人爬门。我也爬过一趟，就是拉了门档子向上爬两三格，蛮扎劲嗰。平常日脚，大门是勿许爬上爬落嗰。唐帼英小辰光外号“小矮子”，搿歇长得比我高，有辰光阿拉开玩笑，讲伊长得高是爬门爬出来嗰。

第三桩事体是用纸头揩嘴巴。年初一早浪起床，穿好姆妈买个新衣裳，摸摸枕头底下个压岁钿，等外面开始“噼里啪啦”放炮仗了，就可以开开心心出门去寻小朋友白相了。出门辰光，大人一边关照阿拉看到人要叫新年好，一边会拿张纸头帮小囡揩揩嘴巴，意思是嘴巴要清爽不讲坏话，小朋友之间也勿要吵相骂。假使真个有小朋友吵相骂，其他人就会问伊拉：亻那嘴巴揩过口伐？蛮噱嗰。老风俗里有勿少是教人懂道理嗰。