老早过年，剃头师傅邪气忙

文/陈日旭

快要过年了，我不由想起老早过年辰光，一个个有关剃头个“镜头”。先说明一下，笔者是“奔八”老人，迭个老早大约摸分上世纪五六十年代、七八十年代两个阶段。

前一阶段，我还是青少年，住辣曹家渡旧式弄堂里向。埃歇辰光过年，有句闲话叫“新年新世新剃头”，意思是男人家勿管老小侪要剃头。过年剃头是规矩，过年勿剃头是勿作兴嗰。阿拉弄堂口有个理发摊，一年四季几乎天天开业，剃头师傅是一个胖墩墩个大块头，苏北口音交关重。伊个手艺倒是蛮好，附近居民侪叫伊剃头，生意勿错。

理发摊“设备”简单：一只木头三脚架，上头搁面盆，下面是一只木箱，里向摆剃头家什；木架一只脚浪端挂一条黑灰色、油光光个刮

刀布，是用来刮剃刀嗰。常常看到大块头替人刮胡子，用手指头撸脱刀面浪向个肥皂沫，连同胡子屑一道弹得老远。然后左手拎起刮刀布，右手拿剃刀辣刮刀布浪来回刮几记，动作又快又熟练。另外，旁边还有一只水桶，里向是从老虎灶泡来个热水，拨顾客汏头用嗰。伊搬地方也便当，右肩扛木架，左手拎水桶，一下子就搬脱了。

平常辰光，要剃头个人侪会跑到摊头浪去剃。勿过，一到过年，特别是春节前二三天，摊头浪向经常看不见大块头，阿拉心里侪晓得，迭种情况一般是大块头拨人家喊去上门服务了。

我阿爸就是搿能做嗰，平时走进走出一直搭大块头笑眯眯，打招呼，关系不错。过年老规矩，约好伊“小年夜”到楼下天井里剃头。对大块头来讲，老房七十二家房客，人头多，生意也多；再讲热水侪是人家屋里向现成嗰，可以省成本，所以跑得快。大人剃头比较考究，理发、修面、刮胡子，有个还要挖耳朵、敲背，做全套。阿爸鼎讲究，要吹风，搨交关凡士林定形。阿拉小人比较马虎，头发理清爽就可以，但有几个青年人还是要吹风，弄只“飞机头”嗰。有辰光，也有上点年纪个女人家来凑热闹，叫大块头剪短头发，理理清爽。就搿能，大块头一剃就是几个钟头。

后一阶段，我已是中年人了，大家手头也宽裕起来，理发大多侪去理发店。曹家渡商圈有两家小有名气个理发店，一家专做男宾生意，叫“华森理发店”；另一家专做女宾生意，叫“国泰理发店”。为了做广告，搿两家店侪辣玻璃橱窗里摆出各种发型照片，啥“青年式”“飞燕式”“蘑菇式”“爆炸式”“波浪式”等等，名称多得交交关。再加上相片浪个头像侪蛮登样，吸引了勿少行人个眼光。

每到过年，搿两家店生意红火，延长营业到半夜，里向操作个师傅侪喊腰酸背痛“吃勿消”。特别是“国泰”做女人家头发，细致、讲究、花工夫，顾客等个辰光更长，往往半天还轮勿到，只好叫老公代替排队，自己先回家吃饭。为了打消顾客厌气情绪，店堂里勿仅摆了交关报纸杂志，还有勿少连环画。记得有一年，隔壁阿姨烫发到半夜三更才回来……

几十年过去了，大家好像呒没当年介讲究了，尽管过年还是要弄得时髦点，但平常辰光也经常进美发店保养“头势”。搿能一来，过年忙剃头个景象基本看勿见了。