上海人个馄饨情结

文/管弢

我到日本留学个第一年冬天，读小说《花样年华》，女主角苏丽珍是个小馄饨爱好者，夜里向，伊端一只钢精锅，穿过上海弄堂，去买一碗小馄饨……馄饨成了推动情节个“助燃剂”，也勾起了我个乡愁，想起中浪向辣食堂里吃个寡淡色拉和油腻炒饭，顿觉饥肠辘辘。对我来讲，埃种思乡个感觉远比举头望明月来得直接和强烈。当时觉得，只有一碗热气腾腾、撒上葱花个小馄饨，才能缓解心头思乡个痛。

每一个人灵魂深处侪囥有对家乡美味个记忆。然而，对滋味个记忆究竟是哪能保存嗰，却勿大有人去探究。记忆中个馄饨是鲜美多样嗰，埃歇辰光，石库门里个小囡交关是吃百家馄饨长大嗰。吃得最多个当数菜肉馄饨——青菜加零星点缀个肉末，小囡个个吃得眉开眼笑，吃光自家碗里嗰，还要眼巴巴看别人碗里嗰，现在回想起来，仍旧有点甜丝丝。

到了春季，阿婆会去公园路边挖野荠菜，荠菜馄饨是春天个精灵，鲜得眉毛也会掉下来，是阿拉最欢喜个。还吃过无锡阿婆个开洋馄饨、广东舅妈个虾仁馄饨、崇明阿奶个芹菜馄饨、山东婶婶个韭菜馄饨，最最欢喜个是本地老太太包个草头馄饨，肉香里有一股草头个鲜香，绝对是“天鲜”配。

中国个美食必须依靠“亲知”，只靠文字来描

述和表达是呒没办法表达清爽嗰；没有看到过姆妈亲手擀面个过程，就很难掌握其中个诀窍。菜谱和菜肴个味道之间还相隔一个人，人才是菜肴个灵魂。

馄饨成功掌握了

秀气和豪迈个黄金把握，体现了南方人个灵秀，通过舌尖直达心底。忘记一种味道，也就失去了一份情义。

回国后第一桩事体就是去城隍庙吃一碗馄饨。店堂里有调皮个小囡，有年纪大个爷叔，也有年轻情侣。一碗热气腾腾个馄饨上桌，清润个汤底里飘起一点蛋丝、紫菜、虾皮和香葱，看起来就像一幅水彩画。精致玲珑个馄饨显示出自家个魅力，调皮个小囡安静下来，窃窃私语个情侣停止交谈，馄饨成了现场个主角。大家一口半只，小心翼翼连同鲜汤，吃得秀气斯文。心里向是安静个，面孔浪是开心个，岁月静好，不外如是。

现在上海街面浪向有各种名号、各种工艺个馄饨：澳港云吞、福建扁食、四川抄手、江西清汤……上海海纳百川，有独特个海派文化，馄饨也不例外。

馄饨是故乡个图腾之一，阿拉侪有一份馄饨情结。