两盒鲜奶

文/钱红春

搿天早浪，我买好小菜到小区附近一家奶制品专卖店买鲜奶。当我从冷柜浪拿仔两盒顶大规格个盒装鲜奶到账台付钞票，老板娘看仔一眼就推到边浪客气个讲：“老先生，请侬重新拿两盒。”我看看伊，觉着莫名其妙。

经营搿家店个是一对从安徽来个中年夫妻，我是伊拉个常客，相互蛮熟悉。虽然讲小区附近也有好几家店侪有同样个鲜奶卖，价钿也差勿多，搿家店又是顶远嗰，但我还是欢喜辣搿家店买。因为搿对夫妻勿但勤快，待人和气，开门也是顶早嗰，一开门就有当天个鲜奶。别个店虽然近一眼，但开门晏，外加要到十点以后才有当天个鲜奶供应，跟我买菜辰光碰勿拢。另外，搿家店虽然勿大，但服务一眼勿推板，每趟人还呒没进店，老板或老板娘就会过来打招呼，问长问短，邪气亲热。顶让人感动个是，我每趟侪是买两盒顶大规格个盒装鲜奶，差勿多有五斤重，伊拉怕一只马夹袋太单薄，勿大保险，会另外再套一只，自家试拎几记，确认呒没问题，才会放心送到我手浪。要是碰着落雨天，只要伊拉有空，伊拉还会搀牢我走下店门口个几级台阶，有辰光还送我过马路。

今朝老板娘做啥要我重新换两盒呢？我还是头一趟碰着搿种事体。

我辣搿家店买搿款鲜奶也勿是一趟两趟了，从来呒没买过别个牌子，别个规格个鲜奶，除脱配自家胃口，还因为搿款鲜奶个价钿更加合算。记得去年夏天，老板娘看我一趟要买两盒，就讲天介热，吃勿光会坏脱，损失点钞票是小事体，吃坏脱身体就得勿偿失了，劝我少买一盒。我讲，屋里就我同老太婆两家头，年纪侪勿小了，腿脚侪勿哪能活络，鲜奶个保质期虽然讲只有几天，但两盒勿多勿少，正好辣保质期最后一天吃光。我一趟买两盒，也是想偷点懒，少跑点路。老板娘听我一讲，才“喔”仔一声。

我因为经常去个搿爿店，对店里向各种品牌，各种规格个奶制品，摆辣敞开冷柜个位置清清爽爽，闭牢眼睛也勿会拿错脱。再讲就算自家老糊涂真个拿错脱，同伊也勿搭界，做啥要我调两盒呢？我实在有点摸勿着头脑。

老板娘告诉我，昨日落仔一日天雨，客人比平常要少一眼，搿款鲜奶剩下两盒呒没卖脱。送奶工一早浪来送奶，出于好心，搿两盒就放到冷柜个口口头，好早点卖脱。勿晓得我是搿天早浪买搿款鲜奶个第一位客人，而且一买就是两盒，搿两盒昨日呒没卖脱个鲜奶齐巧侪畀我拿到了，搿能一来保质期就少脱一天。老板娘根据我平常个饮用习惯，其中一盒就会超过保质期，觉着勿放心，就让我调两盒当天个鲜奶。我因为从来呒没辣搿家店买到过隔夜个奶，所以也勿看包装盒浪个保质期。听老板娘搿能一讲，我才恍然大悟。

我调仔两盒当天个鲜奶，心里是满满个感激。