自家事体自家做

文/许德华

2020年秋季开学之前，有关加强大中小学劳动教育个话题一下子热了起来，要求“重视日常家庭劳动教育”“培养孩子生活自理意识和能力”，后来又有报道称上海寄宿制学堂第一次勿允许新生家长进宿舍张罗，十五六岁个高一新生开始了自家搭蚊帐、铺床垫个“第一次”。

客观来讲，现在勿少青少年生活自理能力邪气搭浆，主要原因还是辣辣家长身浪，因为大家侪普遍对小人个学习关心过多，对小人个生活自理能力缺少培养，至于屋里个家务更是勿让小人接触。其实适当做做家务好处勿少，过去“双职工”“多子女”家庭，小人配合家长料理家务是一种常态，比如早浪点火生炉子烧“泡饭”、照顾弟弟妹妹们生活起居、帮父母购买搬运生活物资、平常屋里打扫卫生等等侪是家常便饭，做家务多了，手脚勤快了，日程安排变得合理了，待人接物也更加成熟了。

我小辰光呒没“叮咚买菜”，也呒没“快递直送”，屋里需要采购个食品一般侪是阿拉搿点小人拎仔篮头到菜场里买回来嗰。记得有趟天还呒没亮，我就搭仔邻居个小囡一道去菜场里排队买带鱼（当时个紧俏货），因为是初冬日脚，早浪个风特别冷，阿拉拎篮头个手被冻得发白。带鱼买回来，姆妈拿伊拉做成鱼松，拨辣外地插队个哥哥姐姐加点营养，今朝想起来仍然觉得邪气值得。

开学前包新书，普通个直包速度快但容易坏，复杂个斜角包得慢但是经用。阿拉弄堂里个几个同学侪经常带仔弟弟妹妹一道“做中玩，玩中学”，邪气开心。到了逢年过节，弄堂里打扫卫生几乎是全民参与嗰，阿拉搿点小囡侪会做点力所能及个事体。

事实上会做家务搭仔肯帮助别人个人学习能力侪老强嗰，像一道去买过菜个若萱姐姐，最后一批“插队落户”伊吃得起苦，后来恢复高考伊辣田头收到大学录取通知。

同学晟晖小辰光就搭我比赛做家务，高考之前，伊教我数学，我帮伊复习语文和地理，大学入学报到阿拉俩家头侪是自家肩背手拎行李去嗰。大学毕业以后，伊当了医生，我做了老师。

据说爱劳动个人更富有同情心，与其“四体不勤”，被动煎熬，不如从善如流，主动掌握劳动本领。当前提倡家务劳动，增强青少年动手能力个养成符合国情，是一桩利国利民个好事体。