秋日里来吃秋果

文并图/沈一珠

一个长假过好，秋深了。一个寒露过后，天冷了。

好在，有菊花，迎飒飒寒风怒放；有桂花，清晨夜间，若有似无香出来；还有暖烘烘个秋果，采摘汏晒，蒸煮烘烤。

无论天气如何冷暖交替，风吹雨淋，人总有办法用各色软糯鲜香去应对，去调匀。

春华秋实，世界美妙如斯。

小辰光，石榴难得，要一粒粒剥一粒粒嚼，有半天辰光好吃。

现在，样样侪勿稀奇了，拿石榴一切两爿，大刀阔斧地剥出来，塞进榨汁机里，机器一开，一歇歇工夫就是一杯石榴汁。

因为石榴多子，象征着多子多福；所以，石榴树还是一种蛮常见个景观植物。

石榴花特别，表皮厚笃笃，绽开后，红个黄个花朵钻出来，像层层叠叠个绉纱；好像大部分花侪连花带骨朵落辣地上，只留少数，花谢之后，花骨朵又慢慢收口，结成一个圆果子，看伊从青涩慢慢长大，变成桔红色个果子。

小区里个石榴长不大，小辰光勿懂，会去采下来吃，又酸又涩。长大了，再也不会去尝试了。

交关勇气，侪落脱辣小辰光了。

从小欢喜吃山楂，其实是跟山楂零食有关：山楂片、山楂条、山楂糕、蜜汁山楂、甘草山楂……

后来又认得了冰糖葫芦，终于认得了原生态个山楂，原来，新鲜、呒么加工过个山楂，长得老俏，朱红颜色表皮邪气好看，果肉居然是乳白色嗰；就是果肉又酸又涩，所以，要厚厚交裹一层冰糖上去，用甜味道去解。

有一趟心向好，买了两斤新鲜山楂，汏清爽，去籽，加点水，烧到糊踏踏，放冰糖下去慢慢烊脱，倒是做成两瓶山楂酱嗰。

吃早饭辰光，夹点面包，或者是淡馒头，原汁原味。

上海个秋冬，冰骨丝窨。

迭个辰光，顶顶欢喜马路旁边热烘烘，香喷喷个糖炒栗子摊头了。碰着了，就称1斤；刚炒出来嗰，会有点烫，纸袋口要敞开仔，否则，热气焐辣里向，栗子受潮发软，吃口就勿爽了。

前两天跟几个要好朋友一道吃茶，就吃到了朋友自家烤个糖烤栗子了，可能呒没店堂里炒出来介煞光滴滑；不过，用心思过日脚，总让人满心欢喜。

自家做糖烤栗子需要个材料包括：栗子、油、糖、桂花和水。

做个辰光先拿栗子汏清爽，沥干；用刀切十字花口子，放辣大碗里，加一勺油，拌匀后放入预热过个烤盘。

清水里加少许糖，加热至糖烊脱，加桂花，用刷子拿桂花糖汁刷在栗子表面后进烤箱；烤一歇，翻一翻，等五六分钟，味道香出来，就可以吃了。