记忆里个梅干菜烧肉

文/一 建

虽然我从小就辣上海生活，但因为阿拉爷娘是绍兴人，所以我是吃绍兴菜长大嗰。啥个黄鱼鲞烧肉、四喜烤麸、八宝菜、素蛏子卷、霉千张……最欢喜个还是梅干菜烧肉！记得当年姆妈烧搿只菜用个梅干菜侪是绍兴亲眷通过邮局寄过来嗰。

肉要买一层层个五花肉，上头还要带一眼骨头。先拿五花肉焯水，再拿肉放拉镬子里煸炒，拿煸好个肉放辣梅干菜上头，大火烧开再用小火炖，除脱放一眼白糖其他啥侪不放，大约炖两个钟头，用筷子戳一戳，发现五花肉酥了，搿只菜就烧好了。筷子夹一块肉皮放到嘴巴里，鲜香酥嫩。

迭个是小辰光最喜欢个小菜！当时市面浪物资供应紧张，买肉要凭票，梅干菜烧肉只有逢年过节才能吃到。后来改革开放了，大家日脚好过了，菜场里鱼、肉要啥有啥随便买。

每趟去姆妈屋里，姆妈晓得我欢喜吃迭只菜，总归烧好仔放辣台子浪。后来，姆妈年纪大了，手脚不太灵活。辣阿拉姊妹几家头个强烈要求下，总算答应勿再自家做家务，请阿姨来屋里向照顾伊个生活起居。

因为姆妈平常讲一口绍兴闲话，请来做家务个阿姨听勿懂，所以连佬换仔好几个！后来有朋友介绍来一个老家辣江苏启东个阿姨，终于解决了搭姆妈交流个语言障碍。勿过，搿位阿姨刚刚来个一段辰光有点勿大适应，一日到夜沉默寡言，据说有辰光夜里困觉困勿着，还要吃安眠药。正好小区里有一个海门阿姨，启东搭仔海门基本算一个地方，两个同乡认得以后就经常交往，阿姨慢慢交变得开朗起来，伊搭姆妈个关系也越来越融洽。姆妈住个房子属于大学个家属宿舍，出门走几步就是校园，只要勿落雨，阿姨每天侪会搀仔姆妈到校园里走走，闻闻花香，看看校园里朝气蓬勃个大学生。

姆妈一眼眼手把手教伊烧菜，慢慢交阿姨端上来个绍兴小菜味道越来越好。当然第一道菜肯定是梅干菜烧肉。夹起一块肉只觉得肉皮酥而不烂，第二层当中个肥肉个油全部烧到梅干菜里去了，一眼不觉得油腻；吃到嘴巴里侪是梅干菜个鲜香。我伸出大拇指夸伊：“阿姨，侬烧个梅干菜烧肉一眼不比阿拉姆妈推板！”搿位阿姨辣阿拉屋里一直做到姆妈过世。

后来伊回启东老家去了，我还经常打电话过去问好，听得出阿姨心情交关好，伊现在辣一家生产玩具个工厂里帮工人烧中饭。问伊：人家讲侬烧个菜味道哪能？阿姨开心个讲：“侪讲蛮好吃嗰，梅干菜烧肉特别受欢迎。”