便当是真便当

文并图/沈一珠

上海人讲个便当，就是容易、方便个意思。喏，哦哟，勿麻烦个，便当煞嗰……同样两个字，放到日文里，就变成“存放食物个便携式多层方木盒”，后来又变成装辣盒子里个饭菜。

自从到佘山临时搭了一只窠，因为伊面勿开伙仓，交关朋友辣微信里问：亻那吃饭哪能办？

其实，佘山伊面生活还是蛮便当嗰，交关网浪超市购物，或者快餐店订餐，半个钟头之内侪可以送到。比方肯德基宅急送，订好餐，半个钟头左右，快递小哥就到了。看阿拉房间里侪是水泥毛坯，小弟呒啥犹豫，踏进门来，一边放下箱子，一样样物事拿出来；一边还笑嘻嘻转了转头，参观一下。送小弟到电梯口，回转身来坐好，咖啡、汉堡咾啥，还是烫嗰。

高兴起来，就自家弄便当，也便当嗰。早浪总归要买菜、准备早饭嗰。隔夜浸好个大米、绿豆、百合干，摆进镬子笃粥，三四十分钟里向，可以做交关事体了：先是下单买菜，顺便买一点切片面包、奶酪之类；因为早，一般廿分钟左右送到。然后拿几根黄瓜用盐腌一腌，番茄用糖蜜一蜜；烧好若干白煮蛋，用冷水激一激，壳剥脱，用小刀转仔圈浅浅交切几排小口子，用生抽、糖、陈皮、柠檬汁烧好个汁浸好，需要辰光就搛两只出来。所以，迭个是一种方案：面包+奶酪+黄瓜+番茄+蛋=便当。

当然，过日脚，一成不变是勿来三嗰，常变常新才会有好心情。买菜也是有技巧嗰，比方，牛油果便宜个辰光，4只一盒，盒子里还配了工具和芥茉酱油。自家再配一点球生菜、色拉酱就可以了。所以，迭个又是一种方案：面包+牛油果+球生菜+色拉酱+蛋=便当。

至于面包，也是千变万化嗰，全麦面包、全麦高纤面包、原味白吐司、黑杂粮吐司，每天调调花样，一只只吃过去，经常去个网店里又推出了藜奇亚吐司面包，面粉里加了奇亚籽、亚麻籽和藜麦米，咬上去，毕咧剥落，有一粒粒籽辣嘴巴里绽放个口感。

除脱面包，还有水果，仙居大杨梅、广东麻荔枝、新疆小白杏、无锡水蜜桃、云南红葡萄、新疆哈密瓜……样样侪是好味道。

其实，吃也勿重要，心情好，天天侪是好日脚。