辣锅盖浪爬格子

文/钱红春

退休以后呒啥事体，有辰光就写写小文章。我搿点业余爱好，是我当兵辰光从锅盖浪起步嗰。

上世纪六十年代初，我中学毕业参军入伍。当时我服役个连队里向像我搿能“高学历”个战士勿多，所以被推荐参加连队业余报道组，为连队黑板报、墙报写稿子，有辰光还会寄一份拨军区报纸，但是寄多少退多少。想想也勿奇怪，团里师里个专职新闻干事，一年到头也登勿出几篇，我一个新兵，稿子要想辣军区报纸浪登出来，呒没介便当。正当我泄气个辰光，有天碰着营教导员，伊问我最近写点啥。当发觉我有畏难情绪，就对我讲，部队里侪是“时刻准备上战场”个年轻战士，加强宣传教育，报道好人好事，勿仅可以提高大家个政治觉悟，鼓舞士气，增强战斗力，还能够贯彻党个方针政策，继承和发扬人民军队个光荣传统，是部队政治工作个重要工作。伊还鼓励我讲，写稿是关系到部队建设个大事体，碰着点困难就打退堂鼓，勿是革命战士个品格。教导员个闲话让我豁然开朗，觉着写稿也是一种责任。

一九六四年冬天，连队到山区搞冬季野营训练，住辣村民屋里，夜里困觉打地铺。团部新闻干事对连队个通讯报道工作抓得交关紧。我根据连队训练情况同自家个体会，打好一篇腹稿，准备抽空写出来。因为训练紧张，平常呒没辰光写，好勿容易等到一个礼拜天，我吃好早饭就想抓紧辰光写出来，但又寻勿着合适个地方。当时山区比较艰苦，连队一日三餐侪是蹲辣打谷场浪吃，班务会也是坐辣地浪开，房东屋里个凳子侪是山浪开采下来个石头，吃饭台子就是一个土墩，侪不适合用来写字。正当我寻寻觅觅个辰光，碰着刷锅汏菜个炊事班长，看见伊边浪有只刚刚汏好个木头锅盖，我眼睛一亮，锅盖翻过来摆辣大腿浪，表面平平整整，正好用来写稿！就开口问伊借。伊先是一呆，两只眼睛瞪仔老老大，弄勿懂我要借锅盖做啥，听了我个解释，伊马上用揩布揩干锅盖交拨我，讲：“侬抓紧点写，勿要耽搁阿拉烧中饭。”

我拿好锅盖，寻了一个向阳避风个地方就开始写稿。因为稿子辣脑子里已经翻来覆去想过好几遍，所以写起来勿打搿楞，一歇歇工夫就写好了。稿子写好就同平常一样，寄出去以后一眼呒没多想。

一个多月后个一天，阿拉连队刚刚完成训练，辣半山腰个训练场浪休息，就看见连部文书拿仔一份军区报纸奔到我面前，讲：“侬个稿子登出来了！”训练场浪一记头闹猛起来，担任阵地指挥个副连长还拿我个稿子读了一遍。更加让我想勿到个是，当天夜点名，连长、指导员还特别表扬我一番。从此以后，我写稿更加起劲了，见报率也有所提高，先后被师政治部和军区报社评为“通讯报道积极分子”，写稿也成了我个业余爱好。