小辰光个西瓜趣事

文/赵妃蓉

每年夏天侪是各种瓜果上市个季节，其中个西瓜人人欢喜，西瓜英文是watermelon，特别形象，辣所有水果当中西瓜是水分最充足嗰。小辰光个西瓜品种籽又多又小，吃起来还呒没现在噶爽快，有了无籽西瓜以后，吃西瓜个畅快感觉就更加爽了。再后来连冰淇淋西瓜也出来了，品种做了改良，吃上去更加细腻了，但我还是更加欢喜小辰光西瓜个粗粝口感，最极致个索性就叫沙酿西瓜了，迭个口感就太粗糙了。

小辰光有相当长一段辰光小朋友们侪认为西瓜籽如果勿当心吃到肚皮里去，肚皮里就会长出西瓜嗰，曾经因为吞了西瓜籽下去，我摸着小肚皮担心了好几天，又勿敢问大人，现在回想起来自己也觉得好笑，但是小辰光对一些讲法就是深信不疑嗰。比如辣室内绝对勿可以撑阳伞，否则就再也长勿高了；吃饭个辰光左手一定要揿牢碗，否则长大了就会呒没工作嗰；如果换牙齿了，一定要捺落下来个牙齿掼到对面个房顶浪向，越高越好，证明会越长越高……

用一颗赤城之心去接纳并相信听到和看到嗰，迭个是小辰光最大个一个特点，当自己一点点学会去分辨个辰光，实际浪向童年也就一点点走远了。

再接着讲西瓜，阿拉小辰光个物资供应勿像现在嘎充足，交关多个辰光，西瓜侪是农民伯伯运到城里来卖嗰，所以小辰光大人总归是用尼龙袋买一大袋西瓜，用脚踏车带回来。阿拉小人辣屋里厢老早就捺床底下打扫清爽，等大人捺西瓜搬到屋里以后，阿拉就让西瓜一只只滚到床底下，像打保龄球一样，也是一种乐趣。有隔壁个小朋友比阿拉还要卖力，有一天趁大人勿辣屋里，伊学卖西瓜个人一样，捺床底下个西瓜一只只用刀整齐个切了一块小三角，拿出来尝尝味道，大人回来以后，伊开心个告诉大人伊已经捺西瓜侪尝过味道了，每一只侪老甜嗰。结果么，当然是大人听到差点昏倒，又好气又好笑个每家每户送西瓜，迭种乐趣辣今朝侬是绝对想象勿到嗰。

每个卖西瓜个瓜农侪有充足个自信，敢切开一小块给顾客品尝，勿甜可以勿买，如果呒没当场品尝，回去切开来觉得勿甜，顾客可以捧着西瓜去调，瓜农绝对认账，现在恐怕侬再也看勿到“只只保甜、不甜包换”个广告语了，只有像“初恋个味道”迭种看上去美好但是一点也勿实在个噱头了，因为现在个西瓜侪是批发零售，勿像老早每一只西瓜侪是瓜农自己种出来嗰，所以足够熟悉，也就有了充分个自信。

小辰光每当阿拉捺西瓜吃光以后，姆妈就会赶紧拿只面盆捺西瓜皮全部收集起来，西瓜皮被削清爽以后，就汏一汏，切块后加上酱麻油和味精、盐拌一拌，当天晚上个凉拌菜就诞生了，格道菜爽脆可口，味道邪气赞。长大以后每趟捺西瓜皮丢掉个辰光，我侪会想起姆妈坐辣台子旁边，细心个削西瓜皮，我和妹妹辣旁边热切等待个情景。

西瓜皮还有一个妙用就是帮小人去痱子，用红瓤下个青皮贴牢皮肤摩擦摩擦，虽然痱子勿是马上就消退，但是可以缓解瘙痒，经济又实惠。

每趟切开西瓜，闻着飘散个清甜香味，小辰光个美好时光好像又回来了……