想起老早个“布鞋底”

文/侯宝良

整理旧物事辰光，翻出一只“顶针箍”，后生家问我，搿种有密密麻麻凹点个“戒子”派啥用场？我讲，迭是老底子“扎鞋底”个工具。伊讲呒没看见过“扎鞋底”。也难怪伊，现在六七十岁个老年人也勿一定亲手侪“扎过鞋底”，倒侪穿过姆妈、外婆、阿奶“扎过”个布鞋底。老早子女人辛苦，一家老小一年四季单鞋、棉鞋几十双布鞋底，侪靠伊拉一针一线“扎”出来。北方人叫“纳鞋底”。可以讲，扎鞋底是老早子家庭主妇个基本功。

“扎鞋底”也是一种表达情义个方式，姑娘家有了中意个小伙子，会暗暗测量伊个脚寸，慢慢较扎好鞋底，做双布鞋送拨伊，再“木笃笃”个小伙子也会晓得其中个情分。

扎鞋底先要用烟纸店有买个草秆编结物事贴辣纸头浪个纸板，上海人叫“荷包板”。再按照勿同个脚寸画样，用剪刀剪出鞋底样，用布滚条包缝好一圈毛边，再用零碎布料一层层用浆糊贴上去，足足要叠2厘米厚，用针线暂时跟鞋底样固定，沿鞋样剪脱多余布料。考究个面浪一层要用新布，而且大鞋样一圈，卷进毛边开始二毫米一针相等距离“扎”一圈，边浪有毛边就用浆糊刮一层封牢。因为鞋底邪气厚，针难戳进去，搿辰光戴辣手指浪个“顶针箍”就派用场了，针屁股放辣顶针箍个凹坑里，用力慢慢顶进针头。针穿过鞋底以后，要想拔出来也勿容易，需要用到钳子。一针又一针、一圈又一圈，一只43码个鞋底需要扎六百多针，两只鞋底就是一千两百多针，葛咾有人讲“千纳底”一眼勿过分。扎好鞋底，还要做鞋面，从前为了节约布票，一般家庭尽量勿买布店里现成个鞋面布，侪是自家用做衣裳个布头裁剪嗰。

布鞋底优点是轻松透气，缺点就是勿耐磨。侬看，辛辛苦苦“扎”一双新鞋底，拨阿拉小巴辣子蹦蹦跳跳几天就磨损勿少。有一天，我从老西门跑到虹口公园，刚穿上脚个新鞋子半天就磨脱一半鞋底。后来做好新鞋子，一般侪会请皮匠师傅上好鞋面顺手打个车胎底后掌。再后来又有修鞋店推出热膠鞋底个业务，搿种硫化橡膠后掌比皮匠打个胶皮更加服贴，大大延长布鞋底个使用寿命。到了现在，生活水平提高，塑料、橡胶、皮革鞋子普及，干湿两用又耐穿，逐步替代了布底鞋。搿种“扎鞋底”个传统家务也消失了，才有了现在阿姨妈妈们辣广场舞里多姿多彩个生活。