“汤司令”和蛇皮袋

文/许德华

每趟辣超市里看到装大米个蛇皮袋，就想起老单位“汤司令”拎仔一只蛇皮袋发工资个样子。

“汤司令”姓汤，原来是物理老师，勿过上课有点豁边，后来就调到总务处去了。老电影《战上海》里有个反面角色“汤司令”蛮噱嗰，所以大家打朋叫伊“汤司令”。

汤司令有两桩事体留拨我个印象邪气深：一趟年底文艺表演，汤司令清唱样板戏《红灯记》，唱到高潮，伊一把举起边浪向个大红塑料壳热水瓶，笑得大家肚皮痛；还有就是别具一格拿装大米个蛇皮袋到银行领工资。

老早发工资蛮费手脚，先是搿天到指定银行拿全单位个工资现金全部领回来，其中包括大量零钞和硬币，搿桩事体就是汤司令负责嗰。然后就是分纸币，当时普通职工每月工资几十元，票面5元、10元就算大票了，一角、两角、五角也侪是纸币，最后是一分、两分、五分个硬币。总务处要根据每个人个工资单点好钞票，塞到写好名字个工资袋（信封）里，再附一张一尺长一厘米宽个工资条。每到发工资个日脚，总务处个会计搭仔汤司令侪要忙搿点事体。

从银行领到钞票以后，为了避免辣路浪拨小偷注意，汤司令用报纸、旧毛巾包牢一沓沓钞票，装进蛇皮袋，用绳子绑辣脚踏车个把手浪。假使辣马路浪看到伊，就好像是刚刚从十六铺码头出来，到上海寻工作个民工，蛮好白相嗰。

汤司令毕竟读过大学，教过物理，伊讲发工资领现金总归要淘汰嗰。有人讲汤司令乱讲，伊一本正经解释：有本书叫《科学家谈二十一世纪》，里向就是搿能预测嗰。

哎，果然后来就有了工资打到磁卡、单领工资条个事情，超市购物扫码快得眼睛一眨就“银货两讫”。我陪姆妈到邮局领退休工资，伊看到机器可以“吐出”百元纸币，存折可以让机器自动填写，讲搿省了会计好多力气还勿会出差错。是呀，当年科学家个预言有交关已经实现了。手机看报、工资入卡，快递入户、扫码支付，消费理财样样有；外出乘火车、飞机侪可以通过网络订票，勿需要天勿亮就去售票处排队，网络智能社会越来越灵。