新生活里也有老传统

文/许德华

新晋网红景点北外滩提篮桥城市集市，辣轨交12号线提篮桥站来福士广场个B2层，是仿虹口提篮桥老城区个样子搭建嗰，有老早子个弹硌路、水门汀路，还有挂老式门牌号头个里弄，吸引了交关人去白相，其中有当初住辣此地个居民手里搀仔小一辈，辣复原出来个老街、粮油店、理发店，搭仔门板搁出来个乒乓台拍照，还坐硬板凳搭小书摊老板模型一道拍照合影。

小吃多，堂吃、边走边吃。我辣搿里向吃仔葱油饼看闹猛，勿少新上海人也来兜白相，讲老上海人生活过得蛮有烟火气嗰呀。听到伊拉个闲话，我倒也想起勿少老早子个事体。

老早呒没大超市，杂货店、南货店就像搿歇个便利店，南货店里话梅、盐津枣、鱼皮花生佬啥小零食三五分洋钿一包。读小学辰光，中饭是回到自家屋里吃嗰，吃过中饭回学堂，需要等学堂开门，搿段辰光就可以到周围店家里兜白相。我特别欢喜去南货店，因为我欢喜看营业员包零食。营业员一般会拿一张正方形个黄颜色油纸折叠成三角形小袋，用来包装小零食；还有叠成四方方嗰，像只小枕头，用来包装海带、粉丝之类嗰。营业员扎瓶子个手法也蛮好看——左手摆瓶，右手扎绳，上下翻转三四次，好几只玻璃瓶就服服帖帖扎辣一道了。

记得当时老师还经常利用南货店、粮油店个买卖问题让阿拉练习算术搭仔“四舍五入”咾啥，有同学比营业员算得还快，阿拉侪讲，伊大概是零食吃多了……

打乒乓是小辰光绝大多数人个爱好，当时运动条件差，所以大家侪因陋就简，两条长板凳浪搁块门板就是一只乒乓台子，上头再摆几块红砖充当球网，手里向个乒乓板就是用三夹板做个，板浪向也呒没海绵垫，俗称“光板”。用“光板”打乒乓，声音清脆有节奏，比较大个缺点是用力大了，球容易变形瘪脱。勿过么，搿也是小问题，瘪脱个乒乓球只要勿破，放到热水里泡一泡，球里向个空气受热膨胀，乒乓球就会恢复成圆球，又可以用了。

除脱卖食品搭仔日用品个小店，当时各种修补摊个生意也邪气好，譬如修锅、补碗、配钥匙、修鞋、修笔、修拉链，门门侪是好手艺。当时屋里用个锅子大多数是铝锅，材料比较嫩，锅子容易坏，大多侪是锅底出问题，所以需要换锅底，最初是人工用力拿新锅底扣进旧锅身，后来有了半机械化换锅底，又快又好，价钱也勿贵。有次我还看见一口锅有两三层底，嗯，修好了照样用。现在落雨天勿大有人穿套鞋了，当年套鞋是家家户户个必备品，因为当时碰着刮风落雨，街面浪向就容易积水，大家侪勿舍得穿仔布鞋、跑鞋、皮鞋蹚水走路，所以补套鞋个摊头勿怕呒没生意做。

老早搿眼生活方式，生活消费提倡节约方便，倒是跟当前“15分钟社区服务圈”有相似个地方，“勤俭持家，物尽其用”个老传统也是值得继承嗰。