冬天看露天电影

文/钱红春

我小辰光屋里附近有个篮球场，靠马路一边是枪篱笆围墙。一到夏天，每个礼拜六夜里，篮球场浪就会放露天电影。

露天电影放个虽然大多数是老片子，但当时上班个人一般呒没辰光进电影院，呒没看过个侪算新片子。再讲露天电影个票价要比电影院便宜交关，大人五分，小人只要三分。外加当时电影院呒没空调，夏天进电影院看场电影浑身汗淌淌渧，而露天电影四面通风，要比电影院适意交关。所以看露天电影个人一眼勿比电影院少。我埃辰光呒啥零用钿，一到放露天电影，要么就辣外头扒牢枪篱笆个洞洞眼看，要么就爬到马路边头个树浪看，趟趟勿脱班。有一趟我看得太专心，推板一眼从树浪掼下来。

露天电影是当时城市居民辣夏天比较普遍，又是邪气受欢迎个业余文化生活，后来随着国家影视行业个发展，特别是电视机逐步普及，电影院条件个改善，露天电影就越来越少了。不过，我参军以后，还是看过勿少露天电影，勿是辣夏天，每趟侪是辣“北风那个吹，雪花那个飘”个冬天。

部队有自家个放映队，营区里也有可以放电影个礼堂，平常看电影勿成问题。但每年冬天，部队要到山沟沟里开展冬训野营，条件就呒没介好了，放映队每趟来野营训练基地慰问，侪是放露天电影。

露天电影一般是辣镇浪向个广场浪放。阿拉连队是辣离镇有十几里路个小山村。每趟看电影，除脱站岗嗰，值班嗰，还有生病嗰，一律勿许请假，就算看过了勿想再看也勿来事。而且要像平常行军一样打好背包，看电影辰光好当凳子，防止受冷，搿要比小辰光看露天电影艰苦得多。我记得有年冬天野营辰光，有趟要放《李双双》搿部电影，搿是一部大家盼望已久、反映农村生活个片子。搿天男男女女、老老少少个村民老早就吃好夜饭，扛仔长长短短、高高低低个竹椅木凳，从四面八方赶过来。当时部队有规定，看电影辰光，部队战士只能坐辣广场两边，银幕正面最好个位置要留拨当地群众。

搿天天气蛮冷，小河浜里已经结冰。电影开映后，大家被仲星火、张瑞芳两位演员精彩个表演深深感动，广场浪常常爆发出一阵阵欢笑。啥人晓得电影放到半当中，突然刮起风来，大家冷得瑟瑟发抖。搿辰光，我前头传来“立起来”个口令，随着口令个传递，广场两边所有个战友相互搂腰围成一堵墙，为看电影个群众挡风保暖。

每趟看好电影，辣回村个路浪，因为山路高高低低，四周又乌漆墨黑，稍微勿当心就会掼倒。有一趟有位战友就被石头绊着一记，掼到半山腰浪一个丈把深个坑里向。大家马上解开背包带接起来，拿搿位战友拉上来。听讲搿种坑山浪有交关，是老早“大炼钢铁”辰光留下来嗰。

小辰光看露天电影是享受，参军以后看露天电影，除脱享受，还有作为一名解放军战士守纪律，爱人民个责任。