吃碗扁尖冬瓜汤

◆ 沈一珠

冬瓜扁尖汤，上海人大热天里个家常小菜，烧起来便当，吃下去爽口；加上迭两样物事天生个百搭脾气——

排骨焯水打底，就是荤素调匀个排骨冬瓜汤；加点毛豆子、番茄，就是夏天里特有个酸爽味道；又可以加几片火腿或者一小把开洋，乃末，素面朝天个冬瓜汤一记头活色生香了，像老弄堂里住进一个穿仔高领头旗袍个苏丽珍，拎仔只钢盅镬子去买小馄饨。

冬瓜体态特别，算得上是蔬菜界里个巨无霸，所以，从前到小菜场去买冬瓜侪是现切个，想好买多少，用指甲勒冬瓜皮上划一记，卖菜个会帮侬切一刀，马上拿张纸勒切面上贴好，一是可以锁牢水分，二是可以勿碰龌龊，清清爽爽等下一刀生意。

后来小菜场化整为零为交关夫妻老婆店了，碰着菜老板忙勿过来辰光，伊拉会勒冬瓜旁边摆把长长个刀，想买多少就自家切；看看便当个事体，偏生自家操作起来就荒腔走板，看好仔一寸半地方切下去，到下头，勿是朝外斜脱半寸就是朝里斜仔两寸；再后来网购多了，冬瓜侪是一片片切好塑封好个，便当是便当了，买菜个趣味也少脱交关。不过，夏天走了，秋天就来，所谓时光荏苒，有辰光也就是具象化为一块冬瓜个切法与吃法。

扁尖是好物事，就算腌得变形，也掩不牢伊作为一根竹笋个超凡脱俗个鲜香味道。从前扁尖侪是杭州来个，用竹笋个嫩头，焯熟，压扁，腌透，晒干，再打成一只只结，装辣一只巴掌大小个竹篓里；现在扁尖出处多了，形态上大部分简化成一根竹笋个原生态，塑料袋里轧勒一作堆，好像多打只结头就会影响赚钞票个速度。

吃前头先拿扁尖摆清水里浸泡，去脱点咸味道，等扁尖完全舒展开了，汏清爽，扚成小段，就可以烧汤了；记得先拿扁尖炖出香味道，再摆冬瓜；假使一道摆下去炖，独怕冬瓜酥得没骨子、用筷子侪搛勿起来了，扁尖香味道还犹抱琵琶半遮面。

言归正传，今朝烧只纯素冬瓜扁尖汤，清清爽爽个，跟今年迭个多少有点乌苏个夏季道个别。

材料：扁尖处理好，扚成小段备用；冬瓜切成厚一两厘米个冬瓜片备用；香葱、老姜若干。

做法：开油镬，先拿老姜煸出香味，加适量清水，加入扁尖，大火烧开，小火慢炖，等扁尖个香味吊出来之后，冬瓜片摆进去，大火烧到冬瓜片半透明，关火，焐到冬瓜全透明就好。迭能一碗冬瓜汤，味道接近至简至纯；而冬瓜酥而勿烂，用筷子还可以搛起来；加上冬瓜本身比较清淡，焐一歇，可以吸进足够个鲜香味道。