阿拉个生活比蜜甜

微信扫码看视频听钱程沪语朗读

文\管弢

一早起来，先拿手机买菜。“民以食为天”，退休以后，我直接荣升全家个“生活部长”，头等大事就是安排好一家人个吃喝，要吃得新鲜、吃得健康。空下来个辰光，就按照自家个兴趣来，过我个“斜杠”小日脚。

“叮铃叮铃……”钉钉响了，今朝是老年大学书法班个上课辰光。上海老年大学个课程又多又好，斜气受老年朋友欢迎，同班同学侪是有共同爱好个人，课余交流聚会，不亦乐乎。我辣里头学过文学写作、唐诗宋词、书法绘画等文化课，也学过了珠宝赏析、中西点心、艺术插花、茶艺实操等技能课，顺顺利利从“生活部长”转变为“斜杠老人”。为了让前几年自学个画画更上一层楼，我特意报了书法课，跟老师从楷书《九成宫》开始学。今朝是本学期最后一课，大家一道写春联迎新年。课程结束，又赴“团花”之约。阿拉小区里有勿少邻居欢喜鲜花，就用微信拉了一个“花仙子”群，一道从昆明团购鲜花，用鲜花装点楼道、布置房间，每天个心情侪搭花一样美。今朝群主喊大家一道商量，选点年宵花，让新年个每一天侪美美个。有人提议，搿次多买几份年宵花，再配上屋里小囡写个春联、福字，送拨养老院个老人，“老吾老及人之老”，让伊拉也开开心心过春节。

吃过中饭，大宁茶城有读书会。迭个读书会是一位退休个语文高级教师发起个，每周聚会一次，茶城老板免费提供场地，大家一道读一本书，交流心得、碰撞思想。读一本好书，能收获好几份勿同个感悟，真个收益匪浅。我斜气欢喜迭个读书会，风雨无阻次次打卡，有辰光还会带自家做个点心来分享，大家纷纷称赞，我心里也暖烘烘个。

等我回到屋里，“生活部长”正式上岗。虽然点外卖斜气便当，但是我仍旧坚持亲手为家人做饭做菜。餐桌是一家人个凝聚点，有全家人个期待，也有工作归来个欢声笑语。与家人围桌而坐，灯火可亲，就是平常日脚里最令人留恋个烟火气。

夜饭吃好就是我看书读报个辰光，今朝还有一个任务——复习上海历史博物馆个讲解词。我是上海历史博物馆个“老牌”讲解员，从开馆到现在已经服务八年了，但每次上岗前一天，总归要拿讲解词重新看一遍。春节期间，志愿者侪抢辣报名到馆服务，过个有文化味道个新年。辣上海历史博物馆做志愿者个搿些年，我交了一群志同道合个朋友，大家一道看展览，一道听讲座，一道荡马路，一道寻老上海个味道。

退休后个“斜杠生活”，真个丰富多彩。以前个闺蜜、现在个新朋友，有空就约辣一道，唱歌、插花、香道、瑜伽、上课、看展、听戏、观剧……就像歌里唱个——“阿拉个生活比蜜甜”！