美味萝卜赛人参

文\邵天骏

萝卜是两年生草本植物，也叫菜菔，是阿拉上海人侪欢喜个小菜。看外观颜色，一般分白萝卜和红萝卜，样子要么是长长个圆柱形，要么是圆滚滚个球形，营养老好个。尤其是辣寒冬里向吃，更能吸收伊里面个各种维生素、蛋白质、磷、铁之类个营养物事，老早就有“冬吃萝卜夏吃姜，勿劳医生开药方”个老话，也是平常百姓屋里餐桌浪常见个绿色蔬菜。

辣冷飕飕个冬天，我搭屋里人侪欢喜常吃萝卜，就是看中伊个营养价值。挑好萝卜，分量老重要个。假使掂上去轻飘飘个，那里面大概率空心了，就算外表看起来圆滚滚呒没瑕疵，也容易骗到勿常买菜个宁。所以挑萝卜，勿光要看外形清爽光滑，还要捏辣手里掂掂分量，两面侪要顾到才行。

萝卜本身个性子就百搭，既能拌拌生吃，也能斩成块头或者条子红烧，还能做汤个主食材。处理萝卜个要求也勿高，汏干净、切好，要么凉拌要么下锅烧，总归看搭啥个菜，再定规哪能弄。

用萝卜丝搭海蜇丝拌个凉菜，加好调料，有股淡淡个清香，吃起来刮辣松脆。做法也简单，萝卜切细丝，撒点盐脱点水，摆一歇，就搭海蜇丝一道装盆，再淋点麻油、放眼白糖、撒点香菜，调拌匀脱就好切了，味道真个老灵额！

我屋里还有种生吃个法子，用红萝卜做。一般是红萝卜汏干净切小块，拿菜刀辣砧扳浪敲碎，放香醋、白糖、大蒜头，再加点眼盐和香菜，拌拌匀就是一道老开胃个小菜。勿过调料比例有点讲究，香醋要多眼，盐要少眼，糖就适中就好。搿道菜吃起来清清爽爽、香脆得很，酸里带点丝丝甜，吃辣嘴巴里，甜辣心里向，味道就是勿一样。

另外，冬天吃碗红烧萝卜，也别有一番味道。萝卜搭猪肉是老搭档，鲜香个红烧肉里加眼新鲜萝卜，口感就完全勿一样了。需要注意个是，要先拿肉烧熟了再放萝卜，避免萝卜烧得太烂，否则口感、味道侪要打折扣。红烧个辰光加葱姜料酒，勿光能去腥味，还能吊出鲜味儿。除脱搿种烧法，还有可以做红烧萝卜，临出锅个辰光加眼虾米吊鲜，口感就会上一个档次。

最让我牵记个，还是老伴个拿手菜——萝卜猪肉汤，真个是鲜得眉毛落脱！猪肉辣汤里炖到酥烂，再放切块或者切条个白萝卜。萝卜、猪肉加葱姜辣汤里翻滚，色香味俱全，看一眼就馋唾水溚溚渧。汤头清清爽爽还带点鲜甜味，汤色也变得奶白奶白个。烧菜个看似随手一做，实则做出个味道，让人吃了回味无穷。我呢，也成了蹲辣旁边，品尝萝卜美味、感受汤头醇香个小食客。

萝卜真个老好吃，尤其是冬天个萝卜，我到现在还是对伊情有独钟。我个老伴搭儿子也一样，每到冬天就对萝卜心心念念。萝卜个好，勿光是一道菜，更是冬天屋里餐桌浪抹勿去个情怀，也成了我心里向，永远回味个美好滋味。