让手机休息休息

文\卢忠雁

现在个地铁里简直就是流动个“数字江湖”。匆忙赶路个上班族、背仔书包个中学生、出门白相个爷叔阿姨，人人手里侪拿仔一部手机：要么手指辣手机屏幕浪点点戳戳回消息，要么眼睛一眨勿眨盯牢屏幕看视频，要么耳朵里塞仔耳机摇头晃脑，沉醉辣音乐个世界里。搿块亮闪闪个小屏幕，辣挤挤挨挨个车厢里，既搭起了便捷个生活戏台，也悄悄砌起了一道人与人之间个“隐形墙”。

平心而论，手机为阿拉个通勤之路添了交关亮色。对工作繁忙个人来讲，可以利用车厢里个零碎辰光看邮件、写回复，让工作无缝衔接；对学生来讲，刷错题、背单词，硬生生拿枯燥个通勤路变成了“移动书房”；就算啥正事勿做，看看搞笑视频、听听欢喜个歌曲，也能拿轧地铁个疲惫一扫而空。迭个就是科技带来个实惠，真叫人拍手叫好。

勿过，手机无孔勿入个渗透也带来勿少问题。头一桩：伊潜移默化地减少了公共空间里人与人之间交流个机会。老早有人拎重物，旁边人顺手帮一把，一句“谢谢侬”，一句“勿要紧”，车厢里就有了暖意。现在倒好，大家侪低头看手机，就算离得再近，也像隔了一条黄浦江。

第二桩：过分迷手机，对身体伤害实打实。地铁一颠一颠，屏幕盯久了，眼睛酸、干眼症、视疲劳侪来；天天低头，颈椎像掰弯个筷子，酸得直勿起来。“身体是本钱”，为了刷手机拿本钱赔脱，得勿偿失。更有人看入迷，连到站广播也听勿见，常常坐过站；还有人只顾看屏幕，勿注意安全隐患，平白添风险。

第三桩：手机里个信息大多是“碎片化”内容。短视频嬉笑怒骂、朋友圈家长里短，看看热闹可以，天天沉浸辣里向，思考能力难免退化。久而久之，人就像被困辣一只“笼子”里，眼界变得狭窄，思维变得简单，就好比坐井观天，勿晓得外头世界多精彩，实在可惜。

讲到底，手机本身呒没错，错就错辣使用者勿晓得“分寸”。就像上海人烧菜讲究“浓淡相宜”，生活也要“虚实结合”，手机只是调剂生活个“小佐料”，绝勿能变成主宰生活个“主心骨”。

上海地铁载着人来人往，也载着阿拉对生活个盼头。阿拉享受科技便利个同时，也要留牢人与人之间个温度。勿要让手机变成隔开彼此个“墙”，要让伊变成连接心与心个“桥”。毕竟，生活个精彩，勿光辣手机屏幕里，更辣街头巷尾个烟火气里。

老上海人常常讲“做人要拎得清”，用手机也要拎得清。只有迭能，阿拉个通勤路才会既高效又温暖，上海地铁里，也能重新飘起老底子个温情与热闹。

朋友，帮帮忙，让手机也休息休息。