自带家生买物事

文/周钰栋

新一轮塑料污染治理意见已经开始实施，国家号召大家买物事辰光最好自带包袋。相对于其他地方个限制使用，上海力度更强。上海明确规定商场、超市、药店等场所侪禁止使用一次性塑料购物袋，顾客出钞票买也勿来三。其实“自带家生买物事”还是阿拉生活当中个一项老传统。

就拿老底子早浪出门买小菜、买早点来讲，拎仔一只竹篮头跑到小菜场，素菜、荤菜统统可以朝里向装，假使今朝迭只篮头里装过气味比较浓个鱼、肉，弄得腥气刮溚，勿要紧，只要拿到自来水笼头浪冲一冲，拿板刷刷一刷，弄清爽以后可以继续用。要拷热个豆腐浆，就拎一只热水瓶去盛；要买油条，就拿一根筷子去串；就是买生煎、买馒头也是拿仔钢宗镬子去装嗰。

老早阿拉阿爸、姆妈侪辣工厂里上班，整天忙得团团转，所以屋里向交关家务事侪是阿拉兄弟姊妹几家头做嗰。有一天，我拿仔一只酱油瓶到酱油店里去拷酱油，半路浪勿当心拿酱油瓶敲碎脱了，哪能办呢？急得我眼泪水也出来了。搿个辰光还是阿姐帮我出主意解决了问题，伊拿出三分洋钿零用钿陪我到料瓶商店里买了一只新个酱油瓶。搿里讲到“料瓶商店”，其实老早上海各个区侪有搿种商店嗰，里向勿管是酱油瓶、老酒瓶、盐瓶、糖瓶，还是墨水瓶、雪花膏瓶，五花八门样样有得卖。我写字要用墨水，就到料瓶商店里花一分洋钿买一只墨水瓶，然后再到文具店里花四分洋钿拷一瓶墨水。阿姐要用雪花膏，也是到料瓶商店买一只雪花膏瓶，然后再到百货公司拷雪花膏。

顶有劲嗰是夏天介到酱油店去拷啤酒。要晓得当时酱油店勿是天天侪有啤酒卖嗰，假使有零拷啤酒个消息传出来，弄堂里交关人就会拿仔钢宗镬子、热水瓶、铜吊咾啥，前呼后拥叮叮咣咣个跑到酱油店门口排队。

其实，老底子大家外出买物事侪是自带家生嗰。即使阿爸、姆妈辣厂里食堂看到有好吃个小菜，想买回来让阿拉解解馋，也是买好仔用自家带饭用个饭盒装回来嗰。搿种“自带家生买物事”个习惯现在看起来真个是邪气环保嗰，要是大家能够拿迭个老传统继承下来，葛末，肯定能够让“天更蓝，地更绿”。