学会自家安慰自家

文/钱红春

人难免会碰着点“触霉头”个事体，假使老是怨天怨地，怪三怪四，勿但自家勿开心，对解决问题也呒啥好处。有点人就勿一样，会得自家安慰自家，天塌下来也照样吃得落睏得着。

小辰光一道白相个小周因为参军，已经交关年数呒没碰头，等到再看到伊，已经是一家饭店个老板。伊告诉我，伊从部队退伍以后拨分配到一家纺织厂做保全工，呒没几年就碰着下岗。一开始伊怨自家“运道勿好”，但想想自家年纪还轻，“混”口饭吃吃是勿成问题嗰。伊辣安慰自家个辰光，想到自家辣部队里做过炊事班班长，虽然部队是烧大锅菜、大锅饭，但刀工、火工、切配等基本功侪懂一眼，逢年过节亲朋聚餐，伊弄个菜大家侪讲“嗲”。下岗以后，伊马上报名参加劳动保障部门提供个烹饪技能培训，拿到了厨师资格证书后，交关单位请伊去。几年后，伊自家做老板了。

碰着危机，用自家长处安慰自家，就可能变成机会。

上世纪九十年代初，同事老张辣国外一位亲戚个帮助下，准备让儿子出国留学。需要提交个材料办好了，儿子也按单位规定提前交了辞职信，结果接到亲戚电话，讲伊儿子个材料拨学堂退回来了，还讲伊面学堂就要开学了，搿趟恐怕办勿成功了。老张听了心里发急，勿过转念一想又马上冷静下来，伊安慰自家：急也勿是办法，搿趟办勿成功就等半年再办，再讲搿趟也勿是一定办勿成功。伊回到屋里一眼勿露声色，觉着与其讲出来一家门勿开心，还勿如自家先闷辣肚皮里。一个礼拜以后，亲戚又来电话了，讲伊儿子个申请通过了。原来，搿位亲戚又到学堂里交涉了几趟，拿伊儿子个材料再次上报，终于获得批准。

有勿成功个准备，又勿放弃希望，搿种处事方法就邪气好。

安慰是抚慰心灵个春风，是平衡心理个砝码，是一种理智和冷静。人家个安慰虽然重要，但更要会得自家安慰自家，搿能才会理解和接受人家个安慰，“触霉头”就可能变成“额角头”。