养一盆水仙花去

文并图/沈一珠

坐辣电脑前头，头有点痛。昨日跑出去看电影，出门前辣手机浪看过天气预报，显示最高温度有摄氏十二三度。勿过，风头里还是蛮冷嗰，或许因为是郊区，走辣路浪感觉特别冷，冷着了。

窗外是樟树，四季常绿嗰，搿歇辰光终归有点泛黄。风吹过，叶落声声。朝远处看，屋顶浪个天色居然是青灰嗰，有点像水门汀，又冷又硬；一直讲，要落雨，一直呒没落下来。要么，就是辣捂雪。捂雪天顶顶让人勿爽，窨丝丝，灰蒙蒙。倒勿如大雪纷飞，或者小雪飘飘，侪是通透嗰。

树枝与天际之间，影影绰绰有灰鸽飞过，三五成群。天气晴暖辰光，伊拉侪懒洋洋辣地浪觅食，人走过去，也笃笃定定，勿大睬人；就算有车子开过，勿到伊拉身边，伊拉也勿会飞脱；眼门前，搿点鸽子倒是辣树影当中飞进飞出，勿晓得是勿是受惊了，想要寻地方迓起来。

辰光就迭能一寸一寸朝前走，勿知勿觉，又进到一年廿四节气里倒数第二个节气——小寒里了。小寒胜大寒，是一年当中顶冷个日脚。

忽然想起，搿歇辰光有一桩闲事好做：养一盆水仙花去。到附近花市兜一圈，水仙花球茎已经密密麻麻堆好了。

自家勿会弄也呒没关系，寻个热心老板，帮侬拣几棵，再叫伊帮侬处理一下，拿只球茎削一削，挖一挖。搿种技术，侬勿学也罢。自家勿会做，交拨专家去弄，多少好。

养起来也便当。备一只青花盆，勿浅勿深顶好；盆底放一层水，再寻几粒鹅卵石，放辣水仙旁边凑凑趣；水仙球茎直接摆进去就好，有空辰光调调水，晒晒太阳，伊自顾自会生根长叶，等到花开满枝个辰光，春天也就到了。

从前辰光，看到自家养个水仙，绿叶疯长，七歪八倒，花倒是呒没开几朵，心里会感到纠结。

现在想想，也呒啥啥。世间万物，讲穿了，本来也呒啥好坏，差别只是心情。更何况，总有几朵小花，会为侬踏春而来。