老早看大轮船下水

文/邵天骏

最近从新闻里看到，阿拉中国建造个第一艘大邮轮“爱达·魔都号”成功完成最后一次试航，今年年底就可以交付运营，勿由得想起小辰光看大轮船下水个事体。

当时阿拉学堂搭仔一个造船厂有联系，经常有课外活动方面个合作。有一天，听说船厂里有一条大轮船要下水。班里个几个同学相约一道去船厂个船台，现场观看大轮船究竟是哪能安全进入水，作为一次社会实践活动。

当阿拉结伴提前来到船厂船台，立刻就拨船台浪万吨大轮船个气势深深吸引。装扮一新个大轮船静静矗立辣船台浪，桅杆浪是连成一片个彩旗迎风招展。尤其让我惊讶个是，平时看到江面浪航行个大轮船，总会对船底到底啥样子生出几分好奇，大轮船又哪能会辣水面上劈风斩浪航行？当年个我还是一个愣头小伙，对万吨轮船一无所知。所以对能够到现场，明明白白看到大轮船个全貌，甚至可以用双手抚摸伊平坦个船底，心里涌起少有个兴奋搭仔激动。事实浪，即使到了现在，我依然对造船厂情有独钟，也对与造船相关个消息特别关注。

大轮船离下水个辰光越来越近了，船台浪个工人早已各就各位，我看到船前船后个工人正辣用对讲机，紧张协调下水前个最后事项。十四点整，对讲机里终于传来了一切准备就绪个洪亮声音。听到命令，几个工人手里拿仔大榔头，快速敲松一个个木墩搭仔砂箱。伊拉操作个熟练程度，让阿拉搿点中学生眼花缭乱，目瞪口呆。

或许用了三五分钟，或许只用了一两分钟。船台浪止滑器打开了，缆绳也脱开了，大轮船一点一点从船台滑向江面，速度越来越快。好像眼睛一霎，大轮船就滑入江水之中，激起一道大浪。船头个大铁锚牵着粗大个铁链落入江中，几艘大马力拖轮也前后左右紧跟发力，让大轮船快速稳定下来。这时，数百尾白鸽从船台起飞，辣蓝天白云当中盘旋飞翔，邪气壮观。

去船厂看大轮船，让阿拉心中升起一股巨大个自豪感，搿种自豪感伴随我度过了老多快乐时光。当时有一种传闻讲，上海市民对轮船下水个兴趣一直蛮高个，也被一些旅行社所看好，想让伊成为一个独具魅力个旅游节目。可惜后来因为种种原因，譬如进厂手续、安全问题等呒没能够落实，但是即使只通过电视画面，大轮船下水个气势还是让人震撼。如今，勿少船厂大轮船下水是一艘连辣一艘，已经成为一个邪气普通个生产节点，当年个万吨船台也已经被更长更宽个大船坞取代。船厂个造船设施更先进了，大轮船个合龙更方便了，船舶下水个方式也有了改变，但第一次看大轮船下水个情景依然让我念念勿忘。