搿种小名听勿到了

文/侯宝良

有趟我荡马路碰着长远勿见个老邻居，伊大名叫啥我记勿得了，张口就叫出伊小名“阿四头”。勿晓得啥道理，小名、绰号特别容易记牢。尤其是我小辰光小朋友之间起个小名搭仔绰号，经常会带有籍贯、爷娘职业、人文背景之类个元素，叫起来勿但顺口，还蛮扎劲个。勿像现在小人个昵称比较简单，往往就是一个复音，像冬冬、丹丹咾啥。

当时有个邻居是从苏北来上海，辣阿拉屋里对面空地浪搭仔一间棚棚摊大饼，夫妻俩生了一个儿子，圆面孔大眼睛，刚会爬就满地打滚，大家侪蛮欢喜伊，叫伊“小大饼”。伊爷娘倒也认可迭种叫法，有辰光茄山河，讲起自家儿子，就讲“阿拉小大饼”，至于“小大饼”个阿爸么，自然荣升“老大饼”，成了大家对伊个昵称。后来“老大饼”又有了一个女儿，为了照顾两个小人，伊拿乡下老娘接过来。老奶奶称呼小囡“二丫头”，邻居也侪跟仔叫。接下来，第三个小囡还是女儿，“老大饼”就勿许叫“丫头”了，叫“小三子”，希望再生个儿子。呒没想到，“小四子”“小五子”侪是女儿，一直到第六个才是儿子。乃么，就此刹车，叫伊“小弟”，勿过大家侪叫伊“小六子”。为啥？顺口呀。

至于“小名”是否叫得开，主要看受众环境。我阿姐小名“大毛”，我排行老二，应该叫“二毛”，但呒没啥人搿能叫我。因为我从小性格内向，照现在讲法就是一个“宅男”。平常勿出去白相，邻居勿大有机会碰着我，自然呒没人替我起绰号。屋里向，外公、外婆、爷娘、阿姐侪叫我“小弟”，但是迭个小名辣邻居之间缺乏群众基础，所以叫勿响。至于我两个阿弟就勿一样了，伊拉从小欢喜野辣外头白相，邻居就习惯顺仔“大毛”开始算，跳过我，叫伊拉“三毛”“四毛”。自家人听惯了，也就此当伊拉小名喊来喊去。

有些小名里向还有故事，比如有同学名字里呒没“冬”字，偏偏小名叫“小冬”。据说伊生辣一个特别冷个冬天，爷娘敲开冰块汏尿布，冷得难忘。一个同事名字里呒没“秋”字，小名叫“阿秋”，因为伊生辣中秋节。据说伊姆妈挺仔大肚皮辣公园里看菊花，或许是花粉过敏，“阿秋”一声喷嚏打出来，顿觉肚皮痛，马上送医院，小人生辣半路浪。每当讲起搿眼故事，小辈应当对爷娘有感恩之情。就算辣鼓励大家多生几胎个今朝，搿种小名也听勿到了。