南昌路浪个大同幼稚园

文/冯济民

勒上海南昌路靠近雁荡路口，有一座坐北朝南个三开间两层小洋楼，门口挂了一块刻有“大同幼稚园旧址”个铭牌。迭是当年由中国共产党勒上海创办个第一座幼儿园，主要收养烈士遗孤搭党个干部子女，是一个红色摇篮。我之所以要写伊，是因为1955年个辰光，迭座小洋楼是卢湾区第二中心小学，我勒搿搭读完了一年级。

据记载，大同幼稚园是经周恩来提议、由李立三主持创办个。1929年秋，鉴于有烈士遗孤需要抚养，为革命四处奔忙个干部子女也需要照料，决定由党个外围组织互济会出面开设一个儿童福利机构。次年三月，大同幼稚园勒上海江宁路（原戈登路）附近个石库门房子里成立，园名寓意“世界大同”。勿久，该园迁往南昌路48号（原陶尔菲斯路341号）。迭搭环境幽静，由地下党员董健吾管理。

1930年11月，毛泽东妻子杨开慧勒长沙英勇就义。勿久，勒上海中共中央机关从事出版发行工作个毛泽民获悉三个侄子生活艰难，经党组织同意，帮伊拉辗转来到上海，进入大同幼稚园。三兄弟经过长途跋涉，终于勒迭搭有了一个温暖个家。

出于安全考虑，周恩来请宋庆龄为大同幼稚园题写牌匾，又请国民党元老于右任题写园名。有了迭两块招牌掩护，反动警察一般勿敢随意骚扰。

大同幼稚园实行全托制，先后收养约30个小囡，其中有彭湃儿子彭阿森、恽代英儿子恽希仲、蔡和森女儿蔡转、李立三女儿李特等。几位保育员兢兢业业，对小囡倾注了全部个精力搭爱心。小囡每天起居饮食、游戏活动侪安排得比较合理，年龄大一眼个小朋友还要上文化课。

大同幼稚园靠近复兴公园（原法国公园），天气好个辰光，保育员常带小囡到公园去白相。大家坐勒草地浪晒太阳，一道唱儿歌，邪气开心。有一趟，全体师生还辣公园里合影留念，迭张珍贵个照片保存至今。毛泽民搭妻子勒去江西中央革命根据地工作之前，曾专门去看望正搭小朋友勒公园里白相个三兄弟，同伊拉告别。

后来，负责中共中央政治保卫工作个顾顺章叛变，董健吾因为搭伊有过工作接触，勿得勿离开大同幼稚园，到淮海中路（原霞飞路）一个秘密联络点躲避。就勒搿辰光，年幼个毛岸龙突发高烧，上吐下泻，病情非常凶险。保育员马上拿伊抱到瑞金医院（原广慈医院）。虽经医生急救，终因治疗无效病故。到1932年3月，一个保育员外出办事突然失踪，党组织为了安全，决定立刻解散大同幼稚园，妥善安置所有小囡。其中，毛岸英搭毛岸青曾由董健吾带回自己屋里抚养。1936年夏，党组织送毛岸英搭毛岸青到苏联学习。

当年我屋里就住勒离迭搭勿远个南昌路74弄。1955年夏，我拨卢湾区第二中心小学录取，编入“秋一乙班”。从1955年秋天到1956年夏天，我就勒小洋楼左面底层个教室里读小学一年级。我勒迭搭接受了启蒙教育，一年级放暑假前，还得到了人生第一张奖状，迭搭留下了我难忘个童年回忆。后来我才晓得迭搭曾经拥有一段红色历史。

大同幼稚园见证了一段历史，现已列为区文物保护单位，是一座有纪念意义个红色旧址。