没体育比赛的日子III

娄一晨

3月的最后一天，国家体育总局出台红头文件：为贯彻落实“外防输入、内防反弹”的疫情防控要求，减少人员流动和聚集给疫情防控带来的风险，切实保护好人民群众生命和身体健康，今后一段时间内，马拉松等大型活动、体育赛事等人群聚集性活动暂不恢复。

夜里，娄老师的电话又响了。

友人：娄兄啊，今朝体育总局最新额通知决定侬看到了伐？乃么僵忒了，中超啊、CBA又勿好开始了咯？

我笑：我就晓得侬老兄又要打电话过来。喂，侬做啥啦？哪能比我心还要急做啥啦？我嘛好歹算是吃迭碗饭个人，我还呒没急来，侬老兄倒是弄得来皇帝勿急急太监一样……

友人：哎呀，娄兄啊，阿哥啊，我欢喜看球呀！哪能办啦？实在是难过煞了呀，全世界体育比赛侪休息了，侪回去隔离了，侬叫我哪能会得勿急？本来以为阿拉国家已经全面复工了，情况基本上已经控制牢了，是可以让中超、CBA打起来了呀……

我：朋友，侬讲了有道理，但是恢复体育比赛毕竟勿像工厂企业单位复工迭能简单。侬想想看，球场里厢几千个、几万个人混了一道，实在勿好控制，危险性太大了……上个礼拜意大利人有新闻报道出来，反思疫情暴发，就讲到2月19日个一场欧冠淘汰赛，亚特兰大主场对瓦伦西亚，蹲了米兰踢额。伊拉意大利人就认为迭场比赛是直接造成整个米兰大区加速爆发个重要原因！还影响到西班牙！

我喝了一口水，继续说：为啥？迭场比赛光是现场观众就有得四万四千多人，闹猛伐？侪是跟牢亚特兰大队跑到米兰去呃。比赛结果又是亚特兰大赢球，大家多少开心，对伐？比赛结束以后狂欢勿是更加开心？一开心么就出事体了呀……再加上对面瓦伦西亚额球迷，随便数数总也有几千个人伐？看好比赛么直接就把病毒带回到西班牙去了呀。所以侬讲讲看，就迭能介一场比赛，多少吓人？

友人一时语塞，片刻后又说：各么按照体育总局额红头文件，今年个中超、CBA还有希望伐啦？

我只有苦笑：迭个我哪能回答侬啦？我只好讲国内体育比赛啥辰光好恢复牵涉到交关因素，交关方面，勿是体育总局一家人家好单独决定额事体。从管理部门个角度廊来讲，目前疫情还呒没完全解决个情况之下，侬叫伊拉去冒迭种风险？要么侬是存心想害人家……放心，兄弟，学堂还呒没开门来，像电影院啊，体育场啊，娱乐场所啊迭种人群聚集个地方有得等了……

友人叹：唉，想想是真个作孽，全世界体育比赛侪歇搁，阿拉迭种球迷受伤最深！苦啊……