恒大新闻“三连击”

娄一晨

没有比赛的日子里，众多体育迷嘴里说得最多的两个字一定是“没劲”。

不过，也有例外。比如，本周就是“有劲”得不得了。

就在前天夜里，娄老师的手机又被友人“骚扰”了。

友人：喂，娄兄啊，迭个礼拜哪能介有劲额啦？连牢三天侪是广州恒大额新闻，真是好白相得来……

我大笑：哈哈哈，侬老兄也看到啦？扎劲伐？

友人叹一口气：唉，伊拉啥事体啦？吃饱了呒没事体做啦？帮中超公司翻毛腔做啥啦？罚50万呀？弄得来像拨罚忒50亿个样子。冤枉鬼叫……还有，乃么只中超冠军奖杯算寻着了伐啦？还寻得着伐啦？

我又笑：侬老兄覅急，阿拉一桩一桩事体来盘……

友人：是额呀，我看到新闻里厢讲中超公司罚伊拉钞票是因为侵犯赞助商利益？是伐？到底啥情况啦？

我：就是去年12月1日联赛最后一轮，恒大主场赢球夺冠，赛后蹲了现场直接就开了一场party庆祝。一开心么就开了一部花车进到体育场里厢兜圈子侬晓得伐？关键是迭部花车车身廊厢贴了恒大自家额汽车品牌广告，乃么阿是侵犯到中超联赛个汽车赞助商了啦？

友人：哦，原来是去年额事体啊？我想来，现在又呒没比赛，赞助商全部一脚踏空，恒大吃饱啦去侵犯啥赞助商！但是，问题是比赛后搞额庆祝活动呀，是俱乐部自家内部个事体呀，关侬中超公司啥事体啦？

我：格机侬老兄问到点子廊来！我看好新闻直接就问了一下中国足协个朋友，人家回答我恒大当时忘记忒了最重要个一点——比赛日！啥意思？就是讲联赛规章里厢强调过，比赛日当天，赞助商额权益必须要得到最严格额保护，尤其是球场里厢！

友人立刻接过话头：也就是讲，假使恒大俱乐部拿庆功party摆到第二天就呒没事体了？各么，冠军奖杯乃？呒没当场就发拨伊拉？

我：唉，侬老兄又问到点子廊厢了……据我晓得当时辰光恒大嘞嗨比赛之前就向足协，也就是中超公司，提出过希望蹲了赛后直接现场颁奖。但是呢，足协个朋友帮我讲，当时辰光北京国安尽管落后2分但是也有机会夺冠，所以为了以防万一，中超公司就决定等到一个礼拜之后再颁奖。

友人：噢，对额对额，侬讲了我想起来了，阿是去年12月份中超颁奖典礼？蹲了上海办呃？

我：呒没错，奖杯应该就是当时辰光发拨恒大俱乐部呃。但是，我也搞勿清爽哪能会得颁奖颁好格只奖杯就寻勿着了？从来呒没碰着过迭种事体！要么碰着赤佬啦？

友人大笑：哈哈哈，娄兄，闲话勿好迭能介讲，啥叫碰着赤佬？侬应该感谢人家，连牢几天弄大新闻出来，多少勿容易？否则，国内介许多体育媒体自媒体，包括侬，侪要呒没饭吃来……