世界杯64队吃相难看

娄一晨

前天，老娄正好约了人在电视台旁边的吴江路吃中饭。还没吃完，又偶遇几位老同事。于是，一通瞎聊，好不开心。

老同事A：娄老师，今朝新闻看到了吗？世界杯又要扩军来！2030年扩到64支球队，闹猛！

我：迭个新闻勿是上半年就已经曝出来了嘛？好像是3月？我记得当时辰光是南美足联动出来额脑筋，提出来额方案。哪能意思，今朝国际足联正式开始讨论了？

老同事B：是额呀！正式讨论来！网廊厢老早就讲来，国际足联拼死拼活就是为了让阿拉中国队出线呀！64支队，亚足联可以分到12.5个名额，乃么阿拉总应该有机会了吗？

我：我觉着呢，迭只方案首先是南美足联自家夹带私货。侬想想看，扩军以后南美洲是勿是还要再增加名额？肯定哦咯……问题是2030年世界杯已经定下来六个东道主，南美就有三个，阿根廷、乌拉圭、巴拉圭。个么南美足联下头一共多少支国家队？10支呀……到辰光三个东道主用勿着参加预选赛，剩下来只有七支国家队还要再打啥断命额预选赛啦？再淘汰一到两支装样子咯？

老同事A：娄老师，根据侬额思路，大洋洲到辰光也要增加名额，最少增加到两支，个么澳大利亚队也好回去了咯？

我笑了：哈哈，聪明！绝对正确！当初澳大利亚队为啥要到亚洲来？就是因为国际足联伊额辰光只肯拨大洋洲0.5个名额呀！假使扩军以后真额有的两个固定名额分到大洋洲，澳大利亚分分钟别转屁股回去……

老同事B：迭个也好呃呀，澳大利亚回大洋洲去，亚足联又能够增加名额到12.5支，阿拉中国队勿是更加有希望出线啦？

我又笑：呵呵，兄弟，理论廊是呒没错，但是首先还是需要阿拉自家有实力能踢出去呀！侬看看交今年额预选赛，侬觉着亚洲现在有几支球队阿拉是好去踢踢呃？作孽啊，留拨阿拉中国队额弱队越来越少来……

一旁我的朋友赶紧出来打圆场。

友人：哎哎，娄啊，勿谈中国队，OK？要么侬再分析分析国际足联为啥介急了又要扩军到64支球队呢？总有道理呃咯？

我脱口而出：为了赚钞票呀！我老早就讲过，国际足联一直是三年勿开张，开张吃三年。凭良心讲，侬国际足联想赚钞票是正常呃，但是，搿副吃相实在是太难看来……