香干水芹白嫩嫩

图文/沈一珠

我欢喜吃水芹，一到水芹上市，姆妈常常会帮我买好、汏好。碰着有辰光瞎忙，呒空去看伊，伊讲，哦，覅紧，不过，帮侬汏好个水芹要锈脱了……嗯，侬屋里是搿能样子嗰口伐？小人欢喜吃个物事，大人情愿摆坏脱，也勿肯去碰。

小区里有只饭店，因为近，也因为味道好，有朋友来，就到伊面去炒两只菜，简简单单，侪是屋里向个味道，所以，阿拉就当伊是自家屋里灶披间了。有趟仔朋友来白相，辣“灶披间”点菜辰光，居然看到香干水芹，朋友老激动了。伊辣国外蹲了十几年了，吃到个芹菜侪壮得来像晾衣裳竹竿。眼门前一碗白白嫩嫩个水芹，让伊一嘴巴馋吐水汪进汪出。

凭良心讲，辣饭店里可以吃到水芹，是老稀奇嗰，因为水芹长辣水塘里，空心根茎里会有交关烂泥，勿一根根捏过，勿肯出来；水里还有蚂蟥，又小又活络，勿仔仔细细拣过，老容易漏网。水芹又辣冬天上市，从前呒么热水器，汏起来老撒度。

只不过，水芹好吃，有一种天然香气，是其他物事呒没办法替代嗰。水芹嫩，一炒一缩头，所以，要配点香干。香干切得习习薄，水芹切成段，一道摆到油镬里炒，摆一点点生抽、一点点糖，翻两翻就好盛出来了。

味道当然覅去讲伊了，就讲颜色，白个香干镶咖啡颜色个边，配水绿个芹菜，端上来是一盆风景。

【沪语解释】

撒度：吃力，累。

一缩头：一下子缩掉。

习习薄：非常薄。