冬去春来 酒香草头

文并图/沈一珠

冷天勿冷，所以，大冷天里向经常碰着春天家个温度——十几度、靠廿度个样子，吃个物事也就丰富起来了。比方讲，年初四上半天，戴仔口罩，辣小菜场里看到碧绿生青个草头，差点激动得想拿口罩脱下来吸口气——当然，最后及时控制牢了，大家侪懂嗰，搿段辰光里向，正确戴好一只正确个口罩，辣一定程度浪，体现出“我为人人，人人为我”个社会责任心。

廿块洋钿一斤，勿便宜，不过，草头细细巧巧，分量轻呀，炒一碗，8两就够了。炒之前，还是要稍许拣一拣嗰，有辰光，会有几根野草夹辣里向；有辰光，还要稍许扚脱一眼老根，否则，吃口会有点硬结结。

汏清爽以后，水沥沥干；炒菜镬子烧热，油倒下去，烧热，草头摆下去，翻炒到有一点点出水了，拿草头朝旁边扒一扒，当中留出一只孔个位置，摆点盐下去，搿能盐容易烊开；有人欢喜摆点糖，我勿欢喜。等一大捧草头瘪下去，淋点高梁酒，拌一拌就快点盛出来，一碗酒香草头成功。

要烧好搿只菜有几个要领：一是油勿好太少，否则，草头会有草腥气；二是白酒要好，道理老简单，一瓶普通白酒跟一瓶茅台，伊拉两者个距离远远勿止一条黄浦江；三是翻炒辰光勿好太长，倒进镬子翻炒到盛出来，顶多一两分钟，火太大或者翻炒辰光太长，草头就焦脱老脱了，也就辜负了迭分春天个鲜嫩了。

冬去春来，生如夏花；只吃好吃个物事，要记牢。