搿趟过年勿一样

文/钱红春

搿趟过年勿一样，举国上下侪辣阻击新型冠状病毒个蔓延。

年初一早浪，我刚刚洗漱结束，屋里电话铃声突然响起，原来是唐老太打来嗰。伊讲搿两天蔬菜有点吃紧，刚刚到菜场买菜，顺便帮我带仔点青菜放辣我门口，关照我收好。

唐老太同我住辣一幢楼里，我搭伊个关系一般，平常偶尔辣小区里碰着也就是招招手，点点头，就算打过招呼了。过年前头，同伊住辣一道个外孙囡要出门，想起电视里“出门要戴口罩”个提示，觉着搿既是对自家个防护，也是对别人个保护，但祖孙两家头翻遍屋里个橱柜也寻勿着口罩。到小区隔壁个药房去买口罩，结果只看到药房门口贴了一张“口罩已卖光”个告示。两家头回来，等电梯个辰光碰着我，就同我讲起搿桩事体。

巧个是，年前我儿子正好送来一包口罩，我就拿了几只拨伊拉。搿袋青菜，大概就是伊来“还情”嗰。本来一般个邻里关系，因为搿场疫情变得紧密起来。

儿子夫妻俩侪是大学老师，老早一到过年，伊拉两家头只是大年夜来我屋里吃顿年夜饭，之后就来煞勿及去忙伊拉自家个事体了。从年初一到年初七，伊拉两家头除脱要到双方长辈和亲眷屋里拜年，还要参加大学同学和高中同学个聚会，还要赶场子参加同事搭仔过去学生组织个饭局，天天排满，一点呒没空。作为老人，阿拉虽然觉着冷清，也只能理解和接受。

今年春节儿子夫妻俩个应酬侪呒没了，结果两家头个心思侪集中到阿拉老两口身浪，天天要打好几只电话，问阿拉吃点啥？身体哪能？屋里还需要点啥？叮嘱阿拉年纪大了，身体抵抗力差，尽量覅到外面去。尽管阿拉屋里啥个物事侪勿缺，伊拉还是会三天两头买点蔬菜或水果送过来。

虽然今年春节呒没迎来送往，街面浪向也有点冷清，但是阿拉心里反而感觉 暖洋洋嗰。