文/许德华
讲起大热天吃啥物事最解渴最煞根?肯定有交关人会选冰西瓜!
小辰光学堂放暑假以后,因为中浪气温高,勿好出去白相,又热得呒没精神看书,只好辣屋里睏中觉。睏醒以后,有辰光屋里大人会拨小囡吃西瓜,虽然埃歇辰光市场里供应个西瓜数量、品种侪呒没现在多,但吃西瓜仍旧是最开心个事体,特别是用井水冰过个西瓜最好吃!
记得离阿拉住个弄堂勿远就有一爿百货商店,到了热天,百货商店旁边会用毛竹搭起一个竹棚,搿就是专门用来卖西瓜个地方。每当运西瓜个“小三卡”(机动三轮车)开到搿搭卸货,弄堂里格小朋友侪会听到消息,然后屋里大人就会派阿拉先去排队。现在回想起来,当时排队等商店开始卖西瓜也是一桩蛮开心个事体,因为队伍里每个人基本浪侪是互相认得嗰,大家聚辣一道呒没啥事体做,就只好寻熟人茄山河,阿拉搿点小巴腊子插勿进闲话,立辣旁边听听也蛮有意思。
我特别欢喜看店里向个营业员从车子浪卸瓜,一般是三个人合作,一个人立辣车斗里拿一只只西瓜抛下车子,一个人立辣车子旁边接牢车子浪抛过来个西瓜再转身抛拨竹棚里个人,一个人立辣竹棚里负责拿西瓜一只只堆起来,伊拉运西瓜就像打篮球,一只只西瓜辣空中飞来飞去,有辰光呒没接牢,西瓜落地裂开来,就会便宜卖拨排队排辣前面个顾客,让勿少排队排辣后头个人眼热。有辰光排队个人太多,运来个西瓜比较少,为了让排队个人侪能买到,店里还会限量供应,每个人只能买一两只,可见埃歇辰光西瓜也是蛮紧俏嗰。
西瓜买回来以后,还有勿少花样经,当时普通人家屋里侪呒没冰箱,就有聪明人拿西瓜放到井里,或者吃之前先用井水泡一歇。水井里向个温度比较低,就好像现在冰箱个冷藏室,西瓜辣井里放一歇再吃,勿但更加清香爽口,甜味好像也变得更浓了。据说中国古代还有叫西瓜为“寒瓜”嗰,可见西瓜果然应该冰过再吃。
西瓜解渴生津祛暑,民谚:夏日吃西瓜,药物不用抓。说明暑夏最适宜吃西瓜。老早西瓜供应紧张个辰光,还有顾客凭医生开个病历卡优先买西瓜个事体。
西瓜好吃,但是小辰光心里一直有一个疑问,“西瓜”搿个名字是哪能来嗰。后来辣学堂里学到西瓜个英文,居然就是水加瓜两个单词拼成嗰(watermelon),所以觉得或许应该叫“水瓜”。还有一种讲法,西瓜搭仔胡萝卜、黄瓜一样,侪是从西域传过来嗰,所以就有了西瓜个叫法。
小辰光另外一桩印象比较深个事体是“堂吃西瓜”,就是辣店里向吃西瓜,店里回收西瓜子,或者自家准备一只小锅或碗盏,到店里买一点“西瓜肉”(瓜瓤)。搿种“西瓜肉”肯定呒没屋里个“冰西瓜”好吃,但是价钿便宜交关。
有辰光西瓜吃脱了还要拿西瓜皮做成菜,具体做法是拿西瓜皮表面个绿皮削脱,再用刀切成细条,用酱麻油拌一拌,就可以了。勿过,只有几种皮比较厚个西瓜品种才能做搿种菜。到了现在,好吃个西瓜品种越来越多,勿但吃口越来越好,瓜皮也越来越薄,已经勿适合用来做菜了。