写写字和唱唱歌

文/吴 毓

小辰光，我有两桩事体邪气欢喜做：写字和唱歌。埃歇辰光我住辣乡下老房子里，附近呒没可以一道白相个同学，唱歌和练字就是我消磨空余辰光个方法。上世纪60年代国家物资匮乏，我练字呒没字帖，也呒没空白簿子，就辣报纸浪向模仿老师个字体。有一趟阿爸想看报，翻开一看，密密麻麻侪是我写个字，就训斥我：“侬看侬看，蛮好个报纸拨侬涂成啥样子了！”我听了，心里邪气委屈。勿过，阿爸个训斥呒没打消我练字个兴趣，我仍旧辣旧报纸浪练字。因为老师板书个辰光稍稍带点草体，所以我练个辰光也带了一点草书个味道。到了小学五年级，老师允许阿拉用钢笔写作业了，有一天我被班主任叫到办公室，伊讲：“侬正楷还呒没写好，写啥草体，先拿正楷练练好……”我听了邪气惭愧，练字个辰光更加注意写得端正。

俗话说熟能生巧，我写个钢笔字一点点登样起来，交关人看了侪讲我肯定从小临摹过字帖，练过“童子功”。其实，我只是辣旧报纸浪模仿老师个板书而已。

因为我写个字比较好看，后来一直辣班级里当宣传委员，负责出黑板报。再后来进单位工作了，也被领导派到宣教科，负责写宣传栏和各种横幅，还办过一段辰光油印个厂报厂刊。

儿子读书以后，学堂里有写字课，还有字帖可以临摹，但儿子总是写勿好，让我教。我就一笔一画写拨伊看，儿子看了又惊讶又羡慕：“姆妈，侬写出来个字为啥介好看啦？”我讲：“写字好像穿衣裳，笔画搭配好了就好看。”

记得几年前，有次我半夜里发高烧，老公带我到附近医院看急诊。我填了张新病历卡，急诊科一位中年女医生为我诊断开药以后，趁老公去拿药，对我讲：“侬个字写得老灵嗰，能帮我填好搿眼表格口伐？”我一看，是职称表。虽然有点啼笑皆非，我还是帮伊写脱了，毕竟人家也是看得起我呀。

其实写得一手好字，更容易让人刮目相看，获得别人个好感，迭个也是桩交关开心个事体。