文/钱红春
现在是“辰光就是钞票”个年代,随便做啥事体侪要争分夺秒,讲究一个“快”。就拿一日三餐来讲,快餐就蛮吃香嗰,街头路边个快餐店一爿接一爿,中餐西点一样勿少,品种交交关,价钿也勿算贵。
现在常见个快餐有盒饭、面条、馄饨、热狗、汉堡、三明治等。大多是事先加工好个半成品,客人来了,只要放进微波炉里转一转或者铁镬子里炒一炒就可以了。不过,再哪能快,从客人进店点单到食品到手,呒没十来分钟是勿来塞嗰。
五十几年前,我看到过一种叫“香辣面皮汤”个面食,要比我现在看到个所有快餐侪快,讲伊是“快餐之最”,我觉得一眼勿过分。
当时,我辣部队里服役。有个礼拜天下半日,我奉命出“公差”到炊事班“帮厨”。搿天夜饭烧好以后,我刚刚汏好铁镬子,正要回班里吃夜饭,炊事班长叫我往灶膛里加点煤,讲要做碗“香辣面皮汤”。原来是侦察班一位战友感冒发寒热,胃口勿好,卫生员关照炊事班,夜饭为伊做顿“病号饭”。
我加好煤以后,看见炊事班长往一只大碗里舀仔一勺面粉,加水后“哐当哐当”调成面浆。搿辰光铁镬子已经烧热,伊拿面浆辣靠近底部个镬壁浪边倒边绕圈,只听见铁镬子里“哧溜哧溜”响,面浆马上凝结起来,伊眼快手快,用锅铲一刮就摊成薄薄个面皮,再用锅铲个尖角辣面皮浪交叉划成一块块菱形,等稍微起焦,就拿面皮铲到镬底,然后加水,加酱油、味精、辣椒粉等,等水烧开以后盛到碗里,又拈一眼葱花,滴几滴麻油,一碗香喷喷,热乎乎个“香辣面皮汤”就做好了。从原料到成品,整个过程一气呵成,前后只有三五分钟,比我后来看见过个快餐侪要快。
后来我听炊事班长讲,“病号饭”有白米粥、面条、咸泡饭等好几种,搿碗“香辣面皮汤”是按照战备要求做嗰,既要快又要好。
搿位发寒热个战友是北方人,平常欢喜吃面食,老早只吃过馒头、面条、饺子、面疙瘩,“香辣面皮汤”从来呒没听到过。当我端到伊床头,伊一边吹一边吃,胃口好得勿得了,拍拍满一碗“香辣面皮汤”,一歇歇工夫就被伊吃得精光,连汤也呒没剩一滴。我问伊“味道哪能?”伊讲:“赞得呒没闲话讲。”
第二天一早,我看见搿位战友又背起各种器材同大家一道训练。我问伊“身体吃得消口伐?”伊讲:“昨日夜里一大碗滚烫个‘香辣面皮汤’吃下去,浑身发热,一觉睏醒身浪侪是汗,现在寒热已经呒没了,感觉好交关。”听伊搿能一讲,炊事班长昨日做个“香辣面皮汤”好像又辣我眼面前冒热气,害得我一直咽馋吐水。