勿一样个泡饭

文并图/沈一珠

前一枪看到勿少讲上海人吃早饭个文章，其中提到上海人欢喜吃泡饭。我认为，老底子上海人欢喜吃泡饭，应该是呒没办法。从前过日脚，勿像现在介宽舒，想屋里吃，开仔煤气灶电磁炉就可以烧；想外头吃，走出去就有饭店点心店。埃歇家家人家用一只煤球炉，夜里封脱仔要到明朝早浪再打开。所以，夜饭总要多烧点，一来是，夜里有人来，或者啥人肚皮饿了，用碗头碗脚小菜过过冷饭，可以垫垫饥；二来也是因为第二天个一顿早饭。

早浪向心急慌忙要出门上班或读书，冷饭用热开水淘淘，乳腐萝卜头过过，又快又便当。偶尔改善一下伙食，也就是出去买两根油条回来，剪剪碎，蘸蘸酱油，已经老好了。毕竟当年侪是讲究勤俭节约，呒没啥人会天天出去吃四大金刚、小馄饨、生煎馒头。

勿过，毕竟是几代人个饮食习惯，现在还是有勿少上海人欢喜泡饭，水煞清，饭滴滑，几化爽气。尤其碰着大热天，夜里早浪吃顿冷泡饭，也算调调胃口。

烧一镬子饭，摆到冷脱，吃个辰光盛一块到碗里，热开水淘淘。

小菜一定要乐惠：荤个是，糟带鱼、醉六月黄、蒜泥白切肉各一碟；素个是，糟毛豆、腌黄瓜、蒸落苏各一碟。一顿夜饭，吃个七八分饱也就可以了。

第二天个早饭，还是泡饭。冰箱里冰过个饭，有点硬，可以来开水里滚滚，盛出来马上吃，辰光一长，就粘滋疙瘩变泡饭粥了。

过泡饭个菜一定勿要马虎：一碟醉麸，有点咸，吃前头用冷开水汏一汏，摆点绵白糖；一碟黄泥螺，隔日夜里浸了冷开水里，第二天味道正好；一碟皮蛋，酱麻油白糖拌拌；一碟咸菜毛豆子，是百吃勿厌个经典；再考究点，可以添一碟糖腌番茄搭仔牛油果吐司。

写到此地，又想起好朋友海燕前一枪送个私房油酱竹笋。有迭能一碟，吃一碗泡饭勿够。