冬日里向有暖心

文并图/沈一珠

已经入冬。按理讲，深秋尽，孟冬至，已经是觉得着寒意个日脚。只勿过，还有一个十月小阳春，所以，拣着一个秋高气爽个日脚，到青浦寻梦源梦水乡，去看花。

车子开辣乡间小路浪向，两边侪是整齐个稻田。有一部分稻子已经割好了，一部分还沉甸甸嗰，辣下半天个太阳光下头，金光铮亮，暖洋洋。

讲起来，青浦是盛产蛙稻米个地方，秋天就要结束个日脚里，新米差勿多也上市了。舀几罐头新米，淘淘清爽，用精煮模式，四五十分钟辰光，烧好仔，趁热盛出来吃一碗，米油铮亮，多少软糯丰腻，一碟咸菜毛豆子过过，就足够了，啥地方还需要大鱼大肉。

饭要吃，花也要看。过日脚光有柴米油盐，没有风花雪月，多少厌气。车子沿仔稻田旁边个小路开到头，就是寻梦源梦水乡了。果然是花天花地，一时头让人忘记还有季节变化迭桩事体。

传说当中个粉黛乱子草，好像并勿适合走近看；本来就是细成粉末个草，走近看反而散了。必须调个大光圈，拍成照片，造个如梦似幻个样子，才像。

倒是一大片向日葵，向阳而生，让人提气，让人想到梵高。1888年8月21日，伊写信拨妹妹：“此刻我正在画插在黄罐里的12朵向日葵花束，接下来我打算用向日葵来装饰我的工作室，除了向日葵，什么都不要。”就算是生活当中有万般勿如意，伊还可以用中铬黄布满整个画面，伊自家内心无拘无束，让别人看得触目惊心。

饭后进公园之前，先到一家农民屋里，伊拉是从三峡移民到此地来嗰，一口重庆闲话辣青浦张马村响起，实在会让人产生一眼间离效果。阿婆一家头住辣此地，屋里年轻下一代、下下一代侪辣外头忙、奋斗。

看见人来，阿婆邪气开心，到自家田里摘了橘子、割了甜芦粟端出来招待。阿婆沟沟壑壑皱纹交关个面孔，满满个是可以给予个自豪……

“无轨电车”从青浦开到梵高，从向日葵开到甜芦粟，其实，过日脚就是搿眼内容，平静、淡然，安顿好自家个身心；就算面临万物凋零，只要有一颗体贴温暖个心，人就勿会孤独、厌气。