养娃和育娃

文/张四英

老年大学“阅读与写作”班下课个辰光，正好碰着小学生放学，所以乘公交车回家路浪总会碰到勿少由老人接回家个小朋友。

搿点小朋友一上车，车厢里就会闹猛起来，看到伊拉个笑脸，听到伊拉“叽叽喳喳”个说话声，想起自家年纪轻个辰光，带女儿到单位附近小学上课个事体，勿由感叹现在个小朋友真勿容易，从小就要和家长一道参与竞争，基本浪呒没白相个辰光了。

我已经七十几岁，住个地方离老年大学比较远，乘公交车总想能寻一个座位，好在上车个车站离218路车起点站不远，所以经常能够如愿。一天，我正辣座位浪打盹，上来一个漂漂亮亮个小姑娘立辣我身边，一边嘴巴里喊“脚酸死了”，一边盯牢我看。假使伊能先同我客客气气打一声招呼，我肯定会让座，但是看到伊个眼神我就不大想睬伊了。后来，看伊身体一直扭来扭去，我还是动了怜悯之心，让座拨伊。小姑娘一屁股坐下来，呒没讲一句谢，旁边穿着体面个外婆也一声不吭，似乎还怪我让座让得晚了。我心里有点勿开心，有心想对小姑娘讲两句：“侬外婆年纪大了，应该让伊坐，哪能只顾自家呢？”再一想，搿位外婆本身不懂礼貌，也就勿好怪小人了，还是少讲两句，免得再引起误会。

又有一次，我坐辣车子前面个三人座位浪，上来一位老伯，带了一个小学四五年级个男小囡，坐辣我身边个乘客马上让座拨老伯，结果老伯让小囝坐下来，自家背仔沉甸甸个书包立辣旁边。车子起步，老伯摇摇晃晃立勿大稳，我有点看勿下去，就对小囡讲：“伊是侬爷爷？”“是嗰。”“侬坐位子，让爷爷立了嗨，还要帮侬背书包，吃力勿吃力？”“伊喜欢搿能。”“侬至少应该拿书包接过来呀。”“嗯。”搿歇辰光，又有人让座拨老伯，伊挥挥手让孙子坐过去，自家仍旧背仔书包立了嗨。我有点蒙，心想或许是我太啰嗦了，人家个宝贝孙子轮勿到我来教育。其实，我蛮想告诉搿位老伯：“溺爱只会让小人变得自私，心胸狭窄，将来到了社会浪是要吃苦头嗰。”

平常过马路，经常看到家长用助动车驮仔小人闯红灯。有一次我与老公走斑马线过马路，差点被一辆闯红灯个助动车撞到，车子浪向是母女两家头。老公大声呵斥：“侬作为家长，哪能可以带仔小人闯红灯？出事故哪能办？”助动车扬长而去，只剩下叹气个老公……

阿拉国家有重视教育个传统，“养不教，父之过；教不严，师之惰……”搿种闲话家喻户晓，但是现在，勿管是家庭还是学堂，侪拿眼光盯辣小人个学习成绩浪，忽视德育方面对小人个言传身教，而小人个道德思想侪是辣家长和老师个潜移默化中形成嗰。

养娃不易，育娃更难。“少年强则国强”，作为长辈，必须首先规范自家个行为举止，拨小人做出好个榜样。有一位作家讲得好：阿拉不能保证小辈未来伟大，但通过正确个教导，至少让伊拉远离渺小。