小辰光挑马兰头

文/周钰栋

一到春天，马兰头可以讲是交关人侪喜欢吃个一只时鲜蔬菜。据医书科普，马兰头性味辛凉，微寒，还有清热解毒、凉血、止血，利湿消肿个功效呢，对治疗咽喉肿痛、疖、黄疸、水肿、痢疾等毛病侪有好处，所以每到春天，马兰头就上了交关欢喜美食个人个菜单。

至于马兰头个吃法，冷拌就蛮好。只要择去老茎、黄叶，留下二三片嫩叶，汏清爽后摆辣开水里汆一汆，去脱涩味，捞起，沥干，切成细末，拌点香干，再浇点麻油、酱油，加点盐，加点糖，就是一道口感清新，香气十足个美食。

现在菜场里就有马兰头可以买，但是我小辰光菜场里是呒没马兰头卖嗰，因为伊是一种野菜，勿是农民田里种出来嗰。当时菜场里只卖人民公社菜地里出产个各种蔬菜，所以想吃马兰头个人就必须自家到路边田头去采。

埃歇辰光，阿拉屋里住辣杨浦区五角场一带，附近有交关农田，一到春天，春风吹过，田埂浪、沟渠边就会窸窸窣窣钻出来交关马兰头，轻轻摊开两片嫩叶，摇曳辣柔柔个春风里，阿拉只要一走到附近就能闻到氤氲辣泥土气息当中个清清淡淡个香气。

每年到了搿个辰光，姆妈就会叫阿拉兄弟几家头利用礼拜天去挑马兰头，阿拉也会喊弄堂里几个小朋友一道去。大家一人手里拎一只竹篮头，跑到赤峰路同济大学后头个农田里，一歇歇跑到田埂浪，一歇歇跑到河浜边浪，蹲下来闷头挑。吃力了就立起来，大家一道唱首歌：“小鸟在前面带路，风啊吹着我们，我们像小鸟一样来到花园里来到草地上……”

假使自家带个篮头装满了，辰光还早，阿拉还会脱下鞋子，卷起裤脚管，走到河沟里摸泥鳅、捉螃蜞。有辰光还会摘几根柳条做成帽圈戴辣头浪，大家分成几组，爬到战争年代留下来个碉堡浪白相打仗游戏。

经过搿能一番无拘无束个白相，到了下半天三四点钟，兄弟几家头回到屋里已经变成几只“泥猴”了，姆妈看到阿拉身浪介龌龊，肯定会骂阿拉一顿，有辰光还会打几记屁股，勿过姆妈个手掌每次侪是高高举起轻轻落下。然后就是催促阿拉几家头用热水揩身体换干净衣裳，自家默默走进灶披间收拾阿拉挑回来个马兰头。

等阿拉身浪收拾清爽，坐辣八仙桌旁边，闻到灶披间里飘出来个马兰头个香味，肚皮里个馋虫就会爬出来，真是人间有味是清欢。

姆妈就是迭能用一双手呵护阿拉健康成长，即使辣三年困难时期，副食品供应短缺，姆妈就利用从野地里挑回来个马兰头搭子荠菜做出各种各样美食，让阿拉兄弟几家头吃饱吃好。

记忆里，姆妈做嗰顶考究个食品就是用马兰头做馅蒸出来个青团。勿但因为制作过程比较繁琐，而且青团个米粉是混合艾草汁做出来嗰，所以马兰头个香气搭子艾草个香气混合辣一道，从蒸笼里飘出来，就是我记忆里春天个味道。

假使阿拉挑回来个马兰头呒没一顿吃光，姆妈就会拿剩下来个马兰头汏清爽，放到开水里汆一汆，再捞起来放辣太阳下头晒干，做成马兰头干收藏起来，等到过年辰光用马兰头干搭子五花肉一道红烧。搿道菜是阿拉屋里每年春节最受欢迎个美味。

到了现在，同济大学后面老早呒没农田了，五角场走边也侪是高楼大厦，野生个马兰头看勿见了。但是生性顽强个马兰头来了一个华丽转身，勿仅拥有了自家个房产（蔬菜大棚），而且还借科技之力笑傲江湖，任凭季节轮转、气候变换，伊一年四季侪可以自信展露自家深浓个绿意，甚至还成了餐桌浪健康美食个代表。