竹荪，着条纱网长裙

文并图/沈一珠

一美是我小学同学，其实，阿拉同学辰光勿算长，因为，勿记得是二年级还是三年级，一美就转学了。

印象当中，伊是娇滴滴个小姑娘，平常勿声勿响，是阿爸姆妈个乖宝宝，连带阿拉老师侪老宝贝伊嗰。

虽然同学年数勿长，勿过，我跟一美曾经辣一只舞台浪一道“战斗”过。阿拉读嗰是一家研究院子弟小学，爷娘侪是同一家研究院里个兄弟姐妹，所以每到逢年过节，学堂里个小朋友侪会事先排练好节目，拨老师带好仔，到爷娘单位里慰问演出。

或许是阿拉两家头长得胖瘦长短差勿多，辣一只节目里，阿拉两家头一道演大头娃娃。

节目勿难，只要一人拎仔一只大红灯笼，穿来穿去，前头跳到后头，后头跳到前头，造出开心个气氛就好了。

辛苦嗰是，阿拉每人要套一只厚纸皮做个大头套；头套浪眼睛位置有两只洞，可以看得到外头。头套大，阿拉人小，套好头套以后外面只剩两条小短腿，所以，舞台下面两家人家看演出个爷娘侪急煞，左面一个大头娃娃，右面一个大头娃娃，倒底啥人是自家囡儿啊！

可以肯定嗰是，两个大头娃娃得到了双倍个欢喜。

过年前，一美问我，侬竹荪吃得惯口伐？

我听了，先想：是勿是应该假客气一记？到底，因为有一段“战斗”友谊托底，我呒没假客气。

结果，一美送来一大包，体积应该跟阿拉小辰光一道套个大头差勿多大小。竹荪，一日三顿侪可以吃。

处理：竹荪长得有意思，像微型丝瓜筋，还套条纱网长裙。竹荪难嗰是吃之前个处理，处理勿清爽，会有一股洗洁精味道，所以，要先用清水泡软，拿菌盖头搭仔搿条一落水就呒没样子个裙子处理清爽；再用温盐水泡一小时左右，轻轻捏干水份；再泡一次，基本浪就呒没啥怪味道了。

每趟处理个数量需要注意，泡少了，花辰光勿划算；泡多了又勿能久放，所以，算好一定个量，搿天个三餐，关键词就是伊了。

竹荪白木耳：辣炖好个白木耳里加一点竹荪，炖半小时左右，再打一只鸡蛋进去，就是一份营养早餐。

竹荪鸡汤：鸡汤炖好以后，放点竹荪，再炖半小时左右，合好咸淡，就可以吃了。

竹荪酿芦笋：芦笋汏好，去老根，焯熟备用；竹荪用鸡汤煨熟；焯熟个芦笋套上竹荪装盆；用鸡汤加稍许蚝油，勾成薄芡淋到盆里就好了。