自家做点“菠菜青团”

文/侯宝良

最近糕团店里青团生意交关好。想起几年前头阿拉扫墓归来，农村长大个弟媳妇发现小路旁边长了勿少艾草就告诉我：“阿哥，迭就是做青团用嗰”。我凑近一看，也随手采了一棵，搭伊手里嗰看起来差勿多，呒没想到伊马上讲我采错脱了。后来只好请伊采了一眼艾草，让我回去自制青团，结果做出来味道蛮好。

今年我又打算自家屋里做青团，因为勿会采艾草，就打算用菠菜来代替，反正侪是青绿颜色嗰。呒没想到，效果居然相当勿错，做多了就放进冰箱里一直享用到现在。平常拿出来招待亲朋好友也是一样时令“甜点”。

有人尝过我迭款“菠菜青团”讲蛮有嚼劲，勿粘牙齿，因为我辣糯米里掺了一点粳米一道磨粉。我还别出心裁用压花膜具来制作，有人看了讲蛮像冰皮月饼，点赞我发明个“印花青团”真是好看又好吃。好朋友老黄怂恿我传经送宝。我请伊有空过来一道实习。

隔日我以三分之一粳米跟三分之二糯米个比例，淘过后用清水浸泡一天。又过了一天，老黄倒有兴趣来了，伊看我滤干浸水后个米，又倒进眼干糯米粉拌匀。问我为啥要迭能呢？我告诉伊，迭能是便于及时用粉碎机加工呀。

我随口关照老黄眼去汏点菠菜，多少么？主要是考虑色彩，随意。汏清爽以后，我就放到开水里去汆一汆，马上捞出来剪碎，再拌进米里，倒进家用粉碎机里一道粉碎。倒出来就是翠绿色个粉末，看得老黄眯花眼笑，嘴巴里勿停称赞。

我指指盆里翠绿色个面粉，转过身来“卖关子”问老黄：“‘掿’面团（揉面）个诀窍想学吗？”“当然啰！”看老黄连连点头。我勿好意思保守了，提起热水瓶倒了点开水，用筷子搅拌成絮状，再加点冷水就伸手一边掿面团，一边告诉老黄用开水个奥秘——搿能可以让面团粘性更加好，做出来个团子就勿容易开裂。

至于团子里个馅料，欢喜咸嗰，可以放点榨菜干丝或者辣酱；欢喜甜嗰，可以放点猪油豆沙、黑芝麻酥、花生酥。

做好个青团放进蒸笼，蒸一刻钟就熟了，千万覅蒸过了头，否则团子就摊成“塌饼”了。