花香配蛋香 茉莉炒鸡蛋

文并图/沈一珠

前两天老朋友碰头，一道到一个朋友个朋友开个饭店去吃饭。结账辰光，肯定是朋友个朋友打过招呼了，店经理一看账单，讲，侬只要付只整数好了。

开心嗰，也请大家理解理解，侪是平常人平常生活呀，省一钿是一钿，勿难为情嗰。

只勿过，就算是朋友个朋友开个饭店，下趟阿要再去，也要想一想。

朋友远道而来，想吃点当令个时鲜菜，问点菜小姑娘，蚕豆有口伐？呒没。腌笃鲜有口伐？呒没。

搿末，新鲜个蔬菜有点啥？鸡毛菜，一年四季侪有。

哦哟，一口气拨小姑娘别牢了，本来还想问，新鲜个茉莉花搭仔塘鳢鱼有口伐……

小姑娘听勿懂，像煞有点勿耐烦了，叫来了店经理，重新点菜。朋友提提精神，再问：河虾有口伐？呒没，有草虾！

朋友叹口气：搿末，侬此地有点啥？经理讲，菜单浪有个侪有。

嗯，迭个闲话大错勿错嗰，菜单浪有啥就点啥好了，吃点啥无所谓，阿拉主要是来碰头嗰。

一桌朋友，侪是三五年、五六年、七八年没见过嗰，碰头少了，感慨就多了。

一时头里，大家拨一个朋友个闲话吸引牢了：我现在开始过个是真正平常人日脚。

问伊，啥叫平常人日脚呢？喏，拿阿姨辞脱，自家辣屋里照顾老爸老妈；天天兜小菜场、孵灶披间，一日三顿亲自动手买汏烧。喏，烧个水平勿比饭店里差，跟老爸老妈讲，屋里一日三餐开销全部我来，老人也愉快地同意了。喔哟，发觉迭个日脚真好，而平常吃用开销真是便宜得来……

嗯，迭能介个平常日脚，阿拉也是天天过嗰，的确是蛮好。

眼门前要准备夜饭，拿出手机下单：一盒茉莉花，50克；一份芦笋500克；一份鸡蛋面350克；屋里还有炖好个老母鸡汤。

夜饭就迭能简简单单了：芦笋鸡汤面、茉莉花炒鸡蛋。

茉莉花炒鸡蛋个食材：茉莉花50克，草鸡蛋2只，盐、油、料酒各少许。

做法：茉莉花清水里浸一歇，汏清爽，沥干备用；两只鸡蛋打碗里，加少许黄酒、盐，打匀后，再摆茉莉花一道打匀；平底锅烧热，倒少许冷油，蛋液倒下去摊平，等伊结成蛋饼。

假使侬能力足够，可以拿蛋饼一记头腾空翻身，当然顶好，出锅辰光就是一只完完整整个蛋饼；假使侬跟我一样，手劲勿足，就只好像我一样，用铲子轻轻交拿蛋饼化整为零，划成一块一块，一部分一部分翻转过来，两面煎到金黄就可以出锅了。

迭能炒出来个蛋，卖相比较登样，花朵安安静静地嵌辣蛋饼里，搛一筷放进嘴巴里，花香配蛋香，味道交关好。