五根手指有昵称

文/陈金生

普通话里，五个手指分别叫大拇指、食指、中指、无名指、小指。上海话里，手指叫手节头（也有叫手节管、手指末头等）。至于五指个叫法，大拇指叫大节头，小拇指叫小节头，其余三指一般照搬普通话。

勿过，我记得上海土生土长个外婆，对五个手指有另外一套叫法。埃歇辰光我年纪小，勿懂啥意思，后来想想倒是蛮有意思嗰。现在就写出来，勿晓得有啥人听到过口伐。

对于大拇指，外婆叫伊“大佬倌”。搿名称一般指有财有势个人（跟大好佬、大老板个意思差勿多）。记忆里外婆常常会跷起大拇指，对阿拉小辈讲：“希望大家将来侪做大佬倌！”着眼于上海普通百姓日常生活个海派情景喜剧《老娘舅》里有一个角色叫杜禄冠，估计就是用“大佬倌”个谐音起个名字。

食指么，外婆叫伊“百有份”。为啥呢？因为食指勿仅可以单独完成指、点、按等动作，交关其他动作伊也要轧一脚，所以叫伊“百有份”，也叫“百搭”。海派喜剧《开心公寓》里有一个角色叫“肖百达”，样样闲事侪要管，估计就是用“小百搭”个谐音来比喻“百有份”个性格特点，交关合适、邪气搞笑。

中指辣外婆嘴巴里叫“侪动气”。因为从手指分工看，中指通常跟其他手指一道集体行动，一般勿会让伊“单干”。假使让伊一家头竖起来，就是一种勿文明个手势，别人看到肯定要动气嗰。

无名指辣外婆嘴巴里叫“会打扮”。“无名指”为啥“无名”？交关人讲是因为取勿出名字。假使真是搿能介，葛末伊跟“打扮”就一点勿搭界了。另外一种讲法就漂亮多了：结婚仪式浪向，新郎拿戒指戴辣新娘左手无名指浪，新娘子从“无名分”一记头升为“有名分”，就此成为新家庭个一分子，而“会打扮”就是称赞无名指锦上添花个功效。

最后，小指被外婆叫做“小有样”。五根手指里，小指最短小，勿过伊“小而玲珑，短而有样”。至于具体哪能“有样”，侬或许可以自家发挥想象，譬如：放杯子辰光小指可以先辣台面浪缓冲一下；拿汤羹时小指跷起一点，是勿是比较优雅。