“花花”欢喜捉迷藏

文/邵天骏

阿拉屋里向一只小狗“花花”，平常特别欢喜向主人撒娇。或许，漂亮是伊最大资本，平常就变得邪气任性，天天盯牢我，要我搭伊一道捉迷藏。

搿天下半日，辣客厅里自己白相个“花花”又开始朝我又蹦又跳，模样交关憨厚可爱。我刚想过去撸一把狗头，啥人晓得伊别转屁股就跑，一记头就勿见踪影了。咦，刚刚还辣主动求撸，原来是虚晃一枪，是又想跟我捉迷藏了！想想自家已经辣沙发浪坐仔蛮长一段辰光了，的确需要起来走动走动，勿如陪伊白相一歇。

三室两厅两卫个房子说大勿大，但是一条小狗想要勿声勿响躽起来，要拿伊寻出来倒的确要费一点工夫。我一只一只房间看过去，结果辣堆仔勿少清洁工具个壁橱角落里看到一条露出来个尾巴。或许晓得自家已经被发现了，“花花”主动跳出来，一边辣我脚边团团转，一边摇头摆尾，面孔浪一副委屈个模样，反而让我对时勿时冷落伊感觉有点勿好意思起来。我弯腰想拿伊抱起来，结果“花花”又欢快个跳开，边跑边回头来看我个反应。看到我想追过去，立刻变得格外精神，看来搿场捉迷藏游戏还得继续下去。

许多情况下头，“花花”躽个地方还是比较隐蔽嗰。经过几轮“人寻狗、狗躲人”个游戏，我对“花花”个聪明也是刮目相看。

总个来讲，经常陪“花花”白相捉迷藏，对我还是有一点好处嗰，自从退休以后，每天个运动量明显减少，时勿时陪伊白相相也算有益身体健康。

有趣个是，“花花”还会看山水、轧苗头。阿拉忙正经事体个辰光，伊要么自家白相，要么就乖乖蹲辣边浪，勿吵勿闹。从搿一点来看，狗通人性个讲法还是有一点道理嗰。有了伊个“热情”陪伴，阿拉一家门侪多了勿少快乐。