冰箱“喇叭腔”以后

文/蒋仲铭

老话讲“勿怕一万就怕万一”，万分之一是邪气低个几率，一般可以忽略勿计，勿过一旦碰着搿种低几率事体真实发生，往往令人措手勿及，带来相当大个麻烦。

三月中旬，妻到外区照顾高堂老母，呒没想到伊拉小区发现新冠疫情，结果就被封闭管理了。我一轧苗头勿对，赶忙去超市进货。我屋里有一只大冰箱，买回来辰光勿长，还辣保修期里，所以就买仔交关猪肉、蔬菜、馒头、方便面、鸡蛋，回来以后分门别类放进冰箱，再加上冰箱里原本个存货，心想：搿眼东西够我吃十天半月了。

啥人想到封控第一天，搿只电冰箱就“喇叭腔”，失去制冷功能，冷冻室里向塞得满满当当个冰鲜食物纷纷土崩瓦解，七零八落。冷藏室里个蔬菜水果也变得蔫头耷脑。我连忙采取应急措施：一蒸、一晾、一晒、一腌，号称“四合一工程”。

一蒸就是拿冰箱里馒头、汤团、八宝饭之类统统蒸一遍，尽快吃脱。一时间，厨房间里侪是“沈大成、王家沙……”好像走进点心铺，餐桌浪馄饨、水饺、甜酒酿。我像点心品尝师，一歇歇甜来一歇歇咸，肚皮里向“打群架”。

一晾就是拿冰箱里个蔬菜统统晾辣地板浪，番茄、黄瓜、卷心菜、土豆、莴笋、西蓝花、香葱、洋葱、鸡毛菜、鸡蛋、咸蛋、火腿肠，看起来像个小菜场。

一晒嘛就是拿冰箱里个笋干、梅干菜之类干货，统统放辣太阳下面晒一晒，再装进塑料袋封牢，以备不时之需。

一腌就是拿冰箱里个猪肉统统腌成咸肉或酱肉：咸盐撸一波，酱油浸一遍，花椒撒一层，烧酒浇一圈，小绳串起来，北窗挂起来。

排队做核酸个辰光，隔壁邻居调侃：咸肉味道好口伐？侬还覅讲，一顿操作猛如虎，手中有粮心勿慌。封控期间，我今朝莴笋炖酱肉，明朝西蓝花炖咸肉，各色时蔬“拉郎配”，美其名曰：“东北乱炖”，搿能介混仔两个多号头。封控期间，政府保供物资陆续发下来，别人家希望发肉，我顶怕发肉，还好只发了一趟。居委会主任讲，天热了，肉勿发了，我心里一块石头才落下来。

五月初，听说网上有保供冰柜供应，我马上下单买了一只袖珍冰柜。隔天送货卡车就来了，送货员勿能进小区，冰柜放到小区门口。我扑哧、扑哧扛到屋里，总算解了燃眉之急。

小区解封第一天，我马上打电话报修。维修师傅来得蛮快，上门检查以后调换了一块电路板，搿只“喇叭腔”冰箱又迎来了伊个“高光时刻”。勿过我心里还是有点嘚嘚动。