治愈心灵的小黄鸭

文/赵妃蓉

前阵子有一只叫“可达鸭”的小鸭子火出了圈，本来只是随快餐赠送的小玩具，辣有疫情的辰光，倒是让勿少人的心情得到了放松，也算是一种心理按摩。

讲到小黄鸭，总会想起小辰光音乐课上老师教阿拉的儿歌《小鸭子》，歌词是“生产队里养了一群小鸭子，我每天早晨赶着它们到池塘里，小鸭子向着我嘎嘎嘎地叫，再见吧，小鸭子，我要上学了”。辣城市里长大，体会勿到歌谣里唱的迭种场景，但是老早路边的小菜场会有人卖小鸭子，如果勿买还可以用鸡蛋和摊主交换。虽然我呒没养过小鸭子，但伊拉毛茸茸的样子特别可爱，总让人摒勿牢要去摸摸伊。记得有心理专家专门研究过，抚摸宠物的皮毛可以让人心情愉悦，帮人降低血压，现在流行“撸猫”“撸狗”，应该也有搿方面的原因。

记得小辰光，我会趁买早饭的机会去撸撸小鸭子，埃歇辰光从来也没听说过禽流感，摊主也不会因为我呒没钞票拿我赶开，反而还会搭仔阿拉搿点小朋友聊聊小鸭子的事体，邪气有耐心。看到自家篮头里的小鸭子有人欢喜，摊主也是老开心嗰。我一直以为就算做生意也勿应该太功利，要晓得事物是会转化的，每个走过路过的人侪可能是潜在的顾客，今朝勿买勿代表下一趟勿会买。少一点功利心，可以让阿拉生活变得更加美好。

到了我的囡囡牙牙学语的辰光，尤其是教伊数字的辰光，经常会唱：“门前大桥下，游过一群鸭，快来快来数一数，24678，嘎嘎嘎嘎，真呀真多呀，数不清到底多少鸭。”因为住辣南浦大桥附近，辣阳台浪可以看到桥浪来来往往的汽车，黄浦江是看勿到的，更覅讲鸭子了，但是迭首儿歌却拓宽了囡囡的想象力。有蛮长一段辰光，伊总归觉得大桥下面是有一群鸭子游来游去，只勿过阿拉看勿到，所以每趟我牵仔伊的小手面对大桥唱迭首儿歌的辰光，伊侪会欢呼雀欲，眼神中满怀着期待。这就是优秀童谣的魅力，勿仅朗朗上口，而且会让小朋友发挥想象力，更会穿越岁月，成为小朋友长大的温暖底色。

尽管小辰光介欢喜小鸭子，但是呒没人会欢喜考试得到一只鸭蛋（零分）。现在辣城市里有种人也会拿鸭子当宠物养，据说伊拉辣屋里也是老黏主人的，主人跑到啥地方伊就会跟到啥地方，如果主人交关多辰光呒没睬伊，伊也会勿开心。好白相的是假使主人也套一只项圈带伊出去散步，伊还会大摇大摆走辣前头，从来也勿肯跟辣人身后。

现在我买的可达鸭已经到货了，每趟吃饭前让伊为我欢快地演奏一曲，真的会让人有好胃口。人生当中有起有落，让小鸭子明亮的毛色点亮一下心情，还可以学习伊能歌能舞的豁达心态，向小鸭子学习了！