鲜荷叶 糯米鸡

文并图/沈一珠

礼拜天早上，7点勿到一眼，小菜就送到了。

黄梅天气，又闷又热，非必要，勿出门，买小菜老啥，就勒网上完成。搿天个送菜小弟新面孔，小菜交到手里，还轻轻交难为情兮兮讲一句：祝侬生活愉快。小弟看上去蛮小，是回转去还可以跟爷娘寻寻吼势、发发脾气个年纪；勿过，伊肯定已经晓得，离开爷娘个世界，要遵守个是另外一份规矩。来勿及拿根紫雪糕，伊已经急匆匆下楼梯了，大概还有好几单要去送，迟到了，还生怕有人投诉。

祝努力工作肯吃苦个小弟们侪会有一份太太平平天天向上个好日脚。

今朝送来个一大堆吃食里向，有两样是重点。一样是焦糖爆米花，拍拍满装勒一只超大牛奶瓶样子个透明罐头里，无论是静悄悄看闲书还是闹哄哄看电视，一把甜滋滋脆蓬蓬个爆米花，让人一记头有种重返童年个快乐。另外一样是一片当季个新鲜荷叶，粉嘟嘟嫩几几，折得平平整整装勒玻璃纸袋袋里。想想，一条河浜或者一只池塘里，铺满潮潮泛泛个荷叶，就有迭能一片，拨人认认真真包好，清清爽爽送到眼门前——感谢眼门前个好日脚。

有了鲜荷叶，糯米鸡侪算有了魂灵头，其他配料凑凑齐，迭只小菜基本浪勿会豁边了，按部就班就好：

第一步，准备。半只清远鸡，汏清爽，切块，焯水沥干；香菇温水泡发，糯米温水里浸一歇（正好看见玻璃瓶里还剩一点点黄小米，就一道摆进去浸，结果，糯米鸡里有一点点小米个爽口，蛮好）。

第二步，腌。大碗里加适量料酒、生抽、盐、一点点糖调匀，鸡、泡好个香菇以及浸好个糯米一道进去，腌半个钟头左右就好，否则，会有点咸。

第三步，蒸。荷叶摊开，你中有我我中有你个铺上糯米、香菇和鸡，用荷叶包紧，顶好扎一道，摆平勒盆里，蒸锅蒸40分钟。

最后一步，出锅，上桌。