搭儿子一道看足球

文/邵天骏

2023年杭州亚运会于10月8号结束了。绿茵场浪，虽然中国男足亚运队呒没晋级四强，多少有点遗憾，但勿少球迷还是从头看到尾，我搭儿子也是天天如此。搿也使我想起了交关年前，儿子作为一个“超级小球迷”对足球个崇拜。

当时儿子还辣读小学，已经是逢申花队搭仔国家队比赛必看。看到儿子坐辣电视机前，一本正经看球、评球个样子，常常让我迭个“老球迷”也自叹勿如。甲A联赛、足协杯赛，阿拉国家队搭仔国外球队个各种比赛，是儿子课余辰光个“必修课”。只要勿与学堂上课辰光冲突，勿影响第二天上学，儿子侪会准时坐辣拉电视机前头，目勿转睛，或喝彩，或叹息，或沮丧，全情投入，收看球场浪侬来我往个激烈拼搏。其间，两只眼睛睁得大大个，两只小手握着拳，小脸微红，完全融入到了风云变幻个赛场当中。

四号球员吴承瑛、五号球员范志毅、廿四号佩雷斯，还有门将蔡建林……每当讲到足球，儿子总是头头是道，如数家珍，勿仅能够评头论足，而且有些看法还确有独到之处。有好几次，儿子迭只“菜鸟”个评论搭仔提问，竟使我迭只“老鸟”哑口无言。让我有点奇怪个是，讲起足球，儿子个记忆力邪气好，到了学习考试，却常常丢三落四，疏忽大意。虽然勿是学习当中有啥难点学勿会，各种知识点也能基本掌握，但是到了考试辰光总会犯一点低级错误，导致成绩勿理想。我想，搿也可能是伊个少年心性使然吧。

等伊年纪稍微大一点了，伊就勿再满足看球，一门心思想要说服爷娘帮伊买一只足球，迫不及待想到绿茵场上一展身手。相对于当时个工资，一只足球个价钿勿便宜，但是辣儿子个软磨硬泡下，妻子终于痛下决心，在一次发工资后为伊圆了足球梦。从此，在户外空地浪向，常常能看到儿子搭仔其他小伙伴一起津津有味踢球个身影。看伊满面春风个得意样，好像已经是一名“称职”个球员了。

得益于踢球等户外活动，让儿子拥有了健康结实个身体。身体壮实了，精神饱满了，学习上也开窍了。埃歇辰光，儿子当上了班级里个体育委员，又是学校个升旗手。一个健康个业余爱好，对伊个学习搭仔后来个工作，侪有良好个促进作用。

时至今日，儿子早已成家立业，伊也总会鼓励小囡放下手机，到户外去，培养一份有利于健康个业余爱好。讲起小辰光当“超级小球迷”个事体，总会跟我会心一笑。