繁花似锦个记忆

文 /赵妃蓉

无论褒贬，电视剧《繁花》对20世纪90年代上海生活个还原确实相当贴切，里向个细节邪气真实。

上海冬天阴冷，就算是外贸公司大楼，汪小姐披仔一头长波浪，穿了一件红大衣，一路飞奔，到办公室照样要套上袖套搭仔半截头绒线手套，搿能衣裳就勿容易弄龌龊，手暖热了也勿影响做生活。哪怕就是伊勒办公室里做广播体操个画面搭仔音乐也真实得让人感动。

阿宝个初恋是公交车售票员，伊拉勒车厢里眉来眼去……埃歇辰光，哪怕车子再拥挤，售票员一定会辣车子开动后一边招呼乘客往里向走一边辣人堆里轧来轧去，收好钞票就撕一张车票，电视剧里连搿种动作也有1秒半特写。有辰光车子到站了，售票员还呒没回到工位浪，就会叫靠近车门个乘客帮忙开门。抱小人上班个人呒没位子坐，卖票员个工作台浪可以拨小人坐一坐，大家也会自觉让点空间出来。

剧中玲子刚从日本回来，阿宝去看伊，帮伊修屋顶。电视剧里只拍了阿宝搭玲子辣屋顶浪个场景，呒没拍伊拉小辰光个样子，夕阳映照，阿宝搭玲子彼此想心事。我想起小辰光弄堂里个小囡侪会爬到屋顶浪向去白相，房子之间距离近，朝对面窗口喊一声或者吹一记口哨，就是集合信号。暑假里向，夜饭吃得早，爬上屋顶，瓦片还是热嗰，一阵凉风吹过来，真是适意。埃歇辰光城市轮廓线里还呒没东方明珠，一眼望出去，天空也好像并勿遥远。记忆里属于城市个狂欢就是国庆节勒三楼晒台浪向看人民广场放焰火，现在回想起来，迭个场景美好得就像超现实画面……

范湉湉演个黄河路女老板卢美琳大概就是上海人讲个“雌老虎”，我感觉表演有点用力过度了。伊个服饰尤其是头浪向顶个爆炸头是90年代上海老板娘个典型，但是伊讲闲话实在太喳喳呼呼，一副要寻吼势个样子，太张扬了。埃歇辰光个老板娘也会粗声粗气，但是一定会讲分寸。对客人勿会一面孔假笑，对熟客个口味、忌口也是熟记于心。答应留个位子一定会留，当然顾客也勿会随便放鸽子，迭个就是互相个信任。实际浪饭店里最赚钞票个是酒水饮料，上路个老板娘会允许熟客自带。到搿种饭店吃饭，坐下来只要关心有啥新菜式，其他只要告诉老板娘有几个人来吃，伊就会安排妥当，用勿着担心被宰洋葱头，也用勿着担心短斤缺两。人手紧个辰光，老板娘会亲自送菜，再搭客人茄两句山河。

对我来讲，看《繁花》就像一场精神按摩，做了一场梦回30年前个梦，里向是阿拉个青春……