葱香芋艿羹

文 /童伟忠

每年崇明红梗芋艿上市，我总会买一点，按照阿娘个做法，做一道葱香芋艿羹，让家人尝尝鲜。半个多世纪前，阿娘做个搿道菜是我小辰光最喜欢吃个家常菜。

就像侬想个一样，葱香芋艿羹确实普通，从食材到烹调，侪呒啥花头。可经阿娘个手做出来，味道就是勿一样。阿娘从菜场挑选叶柄微红、表皮光滑个红梗芋艿，再买一把碧绿生青个小葱，回家汰清爽，拿芋艿放到钢精锅里蒸熟，剥皮待用。鲜嫩香葱四五根切成碎末。铁锅子内倒一调羹菜油，油温上来以后，先放葱末煸炒，等到葱香扑鼻，再拿熟芋艿放进去，搭仔葱一道翻炒，同时用锅铲拿芋艿铲成小块，等到油被芋艿吃进去了，再适量加水、盐、味精、糖，锅子加盖闷烧一分钟，搿道葱香芋艿羹就做好了。左邻右舍个阿姨妈妈走进灶披间，闻到味道，侪会夸一句“真香”。

有辰光，我放学回家，正巧碰到几个买汏烧和阿娘一道勒烧葱香芋艿羹，浓郁香气飘进了弄堂里，听到走过个勿少人侪辣讲：“啥个菜介香啊！”我和邻居几个小八辣子侪希望早点吃晚饭，好尝尝芋艿羹个美味。

葱香芋艿羹介于菜和汤当中，有点像粘稠个流汁，糯滑可口，营养也邪气丰富，还有祛除湿气、解毒、化瘀等食疗功效。

现在搭屋里人下馆子，我总要点一份香葱芋艿煲，可惜味道同阿娘做个相比，还是有勿小距离。阿娘去世40年了，伊当年一日三餐里个那份用心、那份慈爱，让我始终难忘。