难忘一元“压岁钿”

文 /钱红春

现在过春节，假使有小朋友来拜年，长辈往往会拨伊“压岁钿”，所以一个春节过下来，交关小朋友侪能收到勿少“压岁钿”。但是勒我小辰光，大多数小朋友过年收到个“压岁钿”只有一角两角，假使超过一块洋钿是可以勒小朋友之间炫耀一下嗰。我读小学四年级个辰光，第一次收到一块洋钿“压岁钿”，现在想起来仍旧记忆犹新。

一块钱能做啥？辣上世纪50年代，一块钱真是“巨款”。

埃歇辰光弄堂对面小菜场边浪有个“全年无休”个修车摊，是一间背靠工厂围墙搭建个铁皮棚棚，专门修脚踏车、三轮车、黄鱼车。修车师傅是一位单身老爷叔，吃饭、困觉、做生活侪辣搿间棚棚里。伊用修车子换下来个零件，拼拼凑凑装配成脚踏车出租，一个钟头一角。搿天吃好年夜饭，我同弄堂里个几个小朋友合伙租了一辆，大家轮流骑车，开心得勿得了，就好像现在租了一辆豪车开出去兜风一样。那天阿拉几个小朋友玩了一个通宵，我分摊到两角租金。

我刚刚读书辰光有一只铁皮铅笔盒，有趟放学，我搭几个同学辣学堂操场浪踢皮球，拿书包摆辣地浪当球门，一个同学勿当心一脚踏辣我个书包浪，铅笔盒被踏扁脱了。我敲敲打打，勉强修好，但是松松垮垮关勿牢，只好用橡皮筋箍牢，用起来邪气勿便当。有仔“压岁钿”，我就到文具店花一角八分买了一只盖板可以抽进抽出个木头铅笔盒。迭只木头铅笔盒，我一直用到初中毕业。

当时包括我在内，交关同学侪欢喜打乒乓，学堂操场边浪有一只棚棚，里向有几张乒乓台，但是想要打乒乓，就要自家带球拍搭仔乒乓球，否则就只好立辣边浪看闹猛或者喊“加油”了。有了“压岁钿”，我花四角五分，买了一副呒没牌子个光面乒乓板、一只“盾”牌乒乓球。开学以后，阿拉几个小朋友就成了乒乓台边个常客，轮流上场，白相得热火朝天。

剩下来个一角几分，我侪用到弄堂对面个租书摊浪，一分洋钿可以租一本小人书看一天。

现在日脚好了，袋袋里钞票多了，拨小朋友个“压岁钿”也多了。前几日我同几个小朋友讲起自家老早哪能用一块洋钿“压岁钿”个事体，伊拉听了侪笑起来了。虽然物价勿一样了，白相个物事也勿一样了，但“压岁钿”带来个快乐是一样嗰。