手工匠人

微信扫码看视频听钱程沪语朗读

◆ 赵妃蓉

老底子每条弄堂里侪有几个手工匠人，最典型个就是电影《爱情神话》里个小皮匠。伊拉往往捺摊头摆勒了弄堂靠近大马路个地方，可以兼顾到两边个顾客。一双鞋子里一只鞋跟磨损了，老底子个人是勿舍得厾脱嗰，寻鞋匠修修还能穿。我就经常去修鞋子，每一趟鞋匠侪会从一整张黑颜色橡胶皮浪向剪一小块，先用一只钉子固定，再用刀按照鞋跟个样子捺多余个橡胶皮切脱，最后用两只钉子彻底固定。钉好以后，会让我穿勒脚浪走两步试试看，假使有明显个脚高脚低，再会捺另外一只鞋跟换脱，伊绝对勿会一上来就开口让顾客换脱两只鞋跟。有辰光鞋子个线脚脱脱了，伊会用手摇缝纫机缝起来，手摇缝纫机个针眼板是可以伸缩嗰，可以伸到鞋子里向，老方便嗰。

一般修鞋子个摊子侪会顺带便修阳伞，而伞最重要个支撑物就是伞骨，现在大家基本浪只要断脱一根伞骨就厾脱了，因为已经寻大勿着修阳伞个摊头了。

小辰光经常会听到弄堂小贩个叫卖声，“削刀——磨剪刀”“阿有啥坏个棕绷修口伐？阿有啥坏个藤绷修口伐？”……老上海风情影视剧里向经常能听到来自卖花姑娘个“栀子花，白兰花”。其实，阿拉小辰光已经呒没沿街叫卖个卖花姑娘了，经常看到个是阿婆拎了一只竹扁篮头，上头铺一块兰印花布，布头浪向放仔栀子花、白兰花。卖花个阿婆用细铅丝拗出造型，串上白兰花，就可以随身戴了，栀子花串成手串，路过个小姑娘蹲下来试一试，一般就勿舍得脱下来了。卖脱几朵，阿婆就会从篮头里向捺花出来补货，因为就算是当天新鲜采摘个鲜花，花瓣也老娇嫩嗰，放勒了布头浪向辰光长了，花瓣就容易焦黄，卖相难看了，就卖勿脱了。

“阿有啥坏个棕绷修口伐？阿有啥坏个藤绷修口伐？”迭个叫卖声，是礼拜天早浪经常会得听到嗰。埃个辰光呒没席梦思，床浪向用个是棕绷或者藤绷，侪有点弹性嗰，比硬板床适宜。棕绷、藤绷用了辰光长会得断裂变松，就需要修补。叫卖声里最突出个就是“棕绷、藤绷”两个词，像蒙古长调一样，音调拖足。弄堂里个门窗呒没隔音玻璃嗰，有需求个人一听就能听到了。

“削刀——磨剪刀”听上去也老有味道嗰，迭个“削”字发音短促，带出平声个“刀”字，又拖长音，“磨”字发长音，带出“剪刀”，一共五个字，居然充满了跌宕起伏个节奏感，赞啊！现在我有辰光还好了小区门口头看到磨刀个人，一盆清水、一块磨刀石、一只长条凳，就是全部工具了，可惜叫卖声已经听勿到了。

老底仔个匠人绝对是手浪向功夫一流，同时又有朴素个艺术感，搭淘宝客服带拨侬个感觉完全勿一样。老底子物资匮乏，哪怕是搪瓷面盆敲坏了，也有人会修补，呒没介许多一次性用品。虽然现在物资已经极度丰富了，但我觉着“惜物”个精神还是应该有，包括物品本身，搭仔其中包含个情感。